Girtiyên PKK û PAJK’î derbarê girtiyên nexweş Halîl Guneş ê ku îro li Girtîgeha Nimreya 2’an a Ewlekariya Zêde ya Amedê û Abdulrezak Şûyûr ê ku li Girtîgeha Tîpa T a Şakranê ya Alîagaya Îzmîrê de jiyana xwe ji dest dan, daxuyanî weşand.
Denîz Kaya li ser navê girtiyan daxuyanî da. Di daxuyaniyê de ev tişt hat diyarkirin:
“Ji ber feraset û pêkanînên qirker, înkar û îmhayê ya desthilatdariya faşîst a AKP û MHP’ê hevalên me yên girtiyên nexweş Halîl Guneş û Abdulrezak Şûyûr şehîd bûn. Berê jî hevala me Garîbe Gezer ji ber feraseta mêrserwer, di encama tacîz û tecawizê de hatibû qetilkirin.
Careke din derket holê ku saziya darazê ne serbixwe ye û biryara nepenîbûnê danîne ser dosyeya hevala Garîbe. Ev tişt encama desteyên çavdêriyê ne, ya ku wekî metodeke îşkenceyê tê kirin. Polîtîkaya tecrîdê ya ’29 sal ne bes e, heta mirinê’ dibe sedema şehadetan. Di şehadeta hevalên me de yên ku jiyana xwe dane têkoşîna azadî, wekhevî, demokrasî û heqîqetê, feraseta AKP û MHP’ê di serî de Wezareta Edaletê berpirsyar e. Kesên berpirsên van şehadetan e, dê di warê hiqûqî de gelê me bersivê bidin wan û hesabê vî tiştî were pirsîn.
Divê desthilatdariya AKP û MHP’ê û Wezareta Edaletê girtiyên nexweş berde. Ji ber ku DMME, CPT, Dadgeha Makeqanûnê û saziyên navneteweyî di demê de tişta pêwist nekirine, ev şehadet pêk hatine û ev sazî berpirsên van şehadetan in. Em li bendê ne ku ev saziyên navneteweyî Îmrali di serî de li hemberî polîtîkaya tecrîd, zext û îşkenceyê têkevin nav hewldanan.
Careke din hatiye dîtin ku li hemberî faşîzm û qirkeriya ji her alî ve berxwedan, xwerêxistinkirin û çalakî dibin bingeha serkeftin, serfirazî û serketinê. Soza me ya ji bo hevalên me yên şehîd ev e ku wê li Kurdistana Azad jiyaneke bi rûmet û avakirina Neteweya Demokratîk be. Em diyar dikin divê hemû girtiyên nexweş werin berdan. Desthilatdariya AKP û MHP’ê berpirsê rewşên xerab ên li zindanan in.” AMED
