Endamê Grup Yorumî Îbrahîm Gokçek o ke roja 323. ya rojeyê mergî mabên da çalakîya xo û di rojî dima ra cuya xo vînî kerde ewro memleketê ci Kayserî de binê ablûqa û hêrişê polîsan ver bi raywanîya xo ya bêpeynîye ame raştkerdene.
Cenazaya Gokçekî serê sibayî hetê merdimanê ci ra morgê Goristanê Reşadîye ra ameye girewtene û ameye berdene Goristanê Halebî. Goristan bi wesayîtanê zirxinan û polîsanê têgêrayîşê taybetî gerîya binê ablûqa û destûr nêdîya ke çew/e nizdîye goristanî bibo.
Cinîya Gokçekî Sultan Gokçeka ke zîndan de ya binê kontrolê leşkeran de tewrê merasîmî bîye. Sulatane Gokçek rîyê mêrdeyê xo akerd mende pa û tira xatir waşt. Dima ra wecîbeyê dînî ameyî caardene û cenaze ameye definkerdene.
Hele definkerdişî de goristanî ra sloganê sey ”Îbrahîm Gokçek bêmerg o”, ”Grup Yorum nîno hişkerdene”, ”Deyîrî hiş nêkenê” û ”Govendî nêvendenî” bîyî berz.
Badê definî destûr nêdîya ke embazê Gokçekî qisey bikerî û yew keso ke pankart akerd ame derbkerdene. Heskerdoxanê Gokçekî waşt ke deyîra ”Ma rê merg çîn” ya Grup yorumî vajê la polîsan hêriş kerd destûr nêda. Merdiman û avûkatanê keyeyî nêrazîbîyayîş ramojna û vat: ”Şima vizêr nêverda yew dadî fitarê xo bikera Stenbolî ra heta Kayserî lajê xo dima vaz daye. Ewro zî yewe deyîre nimcet verda, nêverda herskerdoxê ey bi deyîrêk ci ra xatir biwazê.” KAYSERÎ
