Endamê Grup Yorumî Îbrahîm Gokçek taxa Kuçuk Armutluyî de roja 312. ya rojeyê mergî de yo. Babî Ahmet Gokçeko ke lajê xo ser o nobete gêno wazeno no zulm cade biqedo. Babî Gokçekî ANFyî reyde qisey kerd û vist vîrî ke wext bîyo teng û venga her kesî da.
Gokçekî ard ziwan ke meseleyê fîzîkî yê lajê ey dewam kenê û vat: ”Hîşê xo de yo. Lajê mi tim sohbetan de hêvî dano merdiman û wazeno ke seba caardişê waştişanê înan merdimî xîret bikerê.”
Gokçekî îfade kerd ke waştişê înan eşkîyenê berê caardene û vat: ”Nê domanî seba mergî nêkewt rojeyê mergî. Nê domanî wazenê bi hawayêkê azadî deyîran vajê û konseran bidê. Nê domanî mergî ra ney cuye ra hes kenê. Hêlîne Bolek zî cuye ra hes kerdêne la a destê ma ra şîya. Eke waştişanê înan rê cewab biameyêne dayene înan do çalakîyanê xo vindartêne. Ê kesê ke tewrê konseranê Grup Yorumî bîyî wa vengê xo berz bikerê. Waştişê ke yenê kerdene eşkîyenê bêrê caardene. Destê kamî ra çi yeno ganî bikero.” STENBOL
