Dewa Asgireke ya qezaya Pilemurîye ya Dêrsimî de Gola Buyere pê xozaya xo bala her kesî ancena xo ser. Gole mîyanê koyî de ya û awa ci hêrikîyena Çemê Pilemurîye ûja r zî hêrikîyena Çemê Haskarî ya Qisle.
Gola kratere nameyê xo Buyere Ana ra gêna û awa ci sey şîfa şinasîyena. Elewîtîya Raya Heqîye de Gola Buyere sey Zîyaretê Buyere Ana pênase bena. Hetê gole de şikefteyêk esto. Merdimî nê şikefteyî de findî visnenê ta û dûayan kenê. Wina vajîyeno ke wextê Terteleyê Dêrsimî de xeylêk kesî sayê nê şikefteyî ra xelisîyayî.
Hemwelatîyê bi nameyê Alî Çalikanî ard ziwan ke ê key bêrê Gola Buyere hem pê qirkerdişî qehirîyenê hem zî pê rindîya gole zerrîya xo kenê rehet.
Îstem Konakî zî Îstanbulî ra ameyo zîyaretê gole. Konakî vat: ”Cayê gole zaf weş o. Seke gulîstan o. Ganî her kes bêro tîya û na rindîye bivîno. Tîya cayêko fîraz ê pîranê ma yo.”
Kadere Bîlgîn zî Erzînganî ra ameya gole ke îbadetê xo bikera. Kadere vat: ”Wa na gole nêra lêşinkerdene. Awa na gole şîfa ya.” DÊRSIM
