Çalakîya ke seba bale antişê grevanê vêşanîye awanîya HDPyî ya bajarê Wanî de dîyabî destpêkerdene hetê grûba 7. ra ameye dewrgirewtene
Çalakîya grevê vêşanîye ke bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke 173 rojî yo grevê vêşanîye de ya dîyabî dest pêkerdene, teber û zîndanan dewam kena. Çalakîya ke bajarê Wanî de seba piştîdayîşê hepsîyanê ke vera tecrîdkerdişê Rayberê PKKyî Abdullah Ocalanî kewtî grevê vêşanîye zî dewam kena. Çalakîya ke Wan de seba paştdayîşê nê çalakîyan yena viraştene hetê grûba 7. ra ameye derwgirewtene. Xeylî kesî tewrê çalakîya ke do 3 rojî awanîya Partîya Demokratîke ya Şaran (HDP) yê qezaya Îpekyolû de dewam bikero bîyî. Sewbîna hepsîyê PKK û PAJKijî grevê xo yê vêşanîye yo ke 134 rojî yo kewtîbî ci resna merheleyêka newî û qerar da ke bikewê rojeyê mergî.
Merdimê hepsîyan ra Nurî Erolo ke çalakî dewr kerd va: “Ma seba vengdayîşê nê çalakîyan dest bi çalakîya vêşanîye kerd û ma çalakîya xo dewrê grûba 7. kerd.”
Merdimê hepsîyan ra Xece Kiyesa ke çalakî dewr girewte qiseykerdişê xo de wina va: “Çalakîya grevê vêşanîye ke bi serkêşîya Leyla Guvene dîya dest pêkerdene, kewta merheleyêka krîtîk. Embazê ma yê ke nika grevê vêşanîye yê bêdem û anêgêrayîşî de yî, do 30ê Nîsane de bikewî rojeyê mergî. No roje do Amed, Gebze, Wan û Bakirkoyî de dest pêbikero. Ma serê nameyê grûba 7. çalakî dewr girewte û ma aşritî omud kenî. Gama ke embazêk cuya xo vindî nêkerdo, wa tecrîd bêro wedartene.” WAN
