Xoverdayîşê Hemsereka KCDyî Leyla Guvena ke seba şikitişê tecrîdê serê Rayberê PKKyî Abdullah Ocalanî dest bi grevê vêşanîye yê bêdem û anêgêrayîşî kerde, roja 184. de dewam keno. Sewbîna vîşêrê 15 hepsîyê ke 30ê Nîsane de dest bi rojeyê mergî kerdî, ewro 15 hepsîyê bînî zî dest bi rojeyê mergî kerdî
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 184. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena. Sewbîna 16ê Kanûne de zindananê Tirkîye de zî çalakîya grevê vêşanîye dest pêkerdbî û 1ê Adare de zî vilayê pêroyê zindanan bîye.
Çend rojî verê nameyê hepsîyê doza PKK û PAJKî ser Denîz Kaya eşkerarîyêk dabî û da zanayene ke grûba diyîn ke 15 kesan ra pê yena do semedê şikitişê tecrîdê serê Rayberê PKKyî Abdullah Ocalanî 10ê Gulane de dest bi rojeyê mergî bikera. Vîşêrê 15 hepsîyê ke 30ê Nîsane de dest bi rojeyê mergî kerdî, ewro 15 hepsîyê bînî zî dest bi rojeyê mergî kerdî. Grûba newe ewro dest bi rojeyê mergî kerde.
Nameyê 15 hepsîyê ke ewro dest bi rojeyê mergî kerdî:
Zîndanê Kandara: Yaşar Cîbaş, Mûhammed Înal, Diyadin Akdemîr, Engîn Kahraman.
Zîndanê Tîpa Fyî yê Bolu: Îbrahîm Dogan, Ahmet Emîn Eren, Mûstefa Taşan.
Zîndanê Patnosî: Sena Efe, Bûrhan Şik, Faysel Atak, Şefîk Kayhan.
Zîndanê Tekîrdagî yê Hûmara 1: Reşad Ozdîl.
Zîndanê Tekîrdagî Hûmara 2: Zekî Bayhan, Yilmaz Yildiz.
Zîndanê Asayîşo Berz yê Wanî: Saît Ozturk. AMED
