Nê rojan de çend weşanê çapemenîye yê hetgirê hukmatî Grup Yorumî sîya kenî û derheqê înan de xeberanê zuran weşênenî. Endamê Grup Yorumî serê hesabê xo yê medyaya komelkî de eşkerayîyêke dayî û reaksîyon nîşanê nê zuran dayî. Endamê Grup Yorum Îbrahim Gokçeko ke 314 rojî yo grevê vêşanîye de yo eşkerayî da. Gokçek ewil dost û goşdarîkerdoxan Grup Yorum silam kerd û wina va: “Seba ke xo heqdar binawnî sere danî heme tewir zuran. Ma rayîrê na dawa de têkoşînê xo dewam kenî. Ma heskerdişê xo her kesî rê erşawena. Ma dê têkoşînê xo dewam bikerî û ser bikewî. Hemverê faşîzmî de do serkewtiş ê ma bibo. Ma do ser bikewî çimkî ma heqdar î.”
Endama Grup Yorumî Bahar Kurte zî dîyar kerde ke medyaya îqtîdarî seba ke serê raştî binimno û heqê înan rê perde bianco her tewir hêrişan keno û wina va: “Hewldayîşê înan meşru nîyo. Hunermendêk û domanêk şarî ke edalet waştêne qetil kerdî. Wazenî no qetlîyamî binimnî. Wazenî xoverdayîş bişiknî. Wexto ke ma nê xeberan wanenî, ma reyna baş fehm kenî ke ma rayîro raşt de yî. Xoverayîş do bibo çeka tewr bi hêz. Kesê heqdar eşkenî xover bidî.” STENBOL
