Walîtîya Dêrsimî konserê Grup Yorum û Grup Îsyan Ateşî yê ke do tewrê Festîvala Munzurî bibiyênî qedexe kerdbî. Komîteya Amadekarîya festîvale zî vizêr bi eşkerayîyêke dabi zanayene ke ê qeraranê keyfîyan nas nêkenê û do konserî bêrê kerdene. Hunermendê ke ewro semedê festîvale şînê Dêrsim polîsan verê înan girewt û destûr nêdanê ke ravêrê.
Grûba Îsyan Ateşî Pirdê Mutî de hetê polîsan ra ameye vindarnayene. Polîsan vat walîtîye mabênê 20 û 26ê temmuze de dekewtişê yê Dêrsimî Grup Yorum û Grup Îsyan Ateşî rê qedexe kerdo.
Grûba Îsyan Ateşî hesabê xo yê medyaya sanale de da zanayene ke polîsan verê înan girewto û destûrê înan nêdanê ke ravêrê la ê anêgêrayî uca pawenê. Grûbe vat: ”Ma do çirey vatişê deyîran cameverdê. Çew nêeşkeno hunerê şorişgêrî bêveng bikero.”
