Hemşaredara Bajarê Girdî ya Amedî ya verên Gultan Kişanak ke wezîfe ra ameye girewtiş û 7 serrî Zîndanê Cinîyan ê Kandirayî de yena tepiştiş, derheqê Newroze de mesajêk pare kerd.
Kişanake mesajê xo yê Newroze de wina vat: “Merheba şarê ma yê coşê Newroze resnenê raşteyan; Newroze erjêke ke bi hezar serran a ma serê lingan de verdena, kena yew. Hemverê xirabî de hêzê xoverdayîşî dana û ruhê ma yê komelî mojnena ra.
Ma do emser tifaqê demokratîke yê tewr hîra ê şarê xo awan bikerê û ma do manaya Newroze 14ê gulane de biresnê serê sindoqe. Bi şarê ma yê bobelatê erdlerzî de dejê girdî antê reyde, ma do hîsê xo yê paştdayîşî bi hêz bikerê û birînanê xo pîya bipêşênê. Ma do hesabê zulm, mergî, bêedaletî, nêheqî, dejê pîlî yê îqtîdarê faşîst bi ma dayî ciwîyayîş bipersê.
Ma seke tepişteyê sîyasî yê cinîyê Kandirayî yenê tepiştiş, xoverdayîşê xo bi xoverdayîşê şima reyde bikerê yew û adirê Newroze pîya tafînê. Ma bi zerrî û bi hişmendiya xo şima reyde raşteyan de yê. Tu hêz nêeşkeno îradeyê şarî esîr bigîro. Heta nika mîyanê çar dêsan, berê asinî, seba ma nînê tu mana û do tîya ra tepîya zî nêrê tu mana. Ma do bi bawerîya ke do govenda azadîye pîya bigerênê silam kenê. Ma Newroza şarê xo pîroz kenê.” AMED
