Vervatoxa HDPyî Ebru Gunaye bînaya merkezîye ya partîya xo de kombîyayîşê çapemenîye de qisey kerd û rojdem ercna.
Qiseykerdişê Gunaye ra beşêk wina yo:
”Îqtîdarê AKPyî sey îqtîranê bîna dest pê îşkenceyî kerd. Tewr peyên qezaya Kanîreşî ya Çewlîgî de hêzanê asayîşî wextê sereştişê keyeyî de wayîranê keyeyî rê îşkence kerd. Nê sereştişî de ma dî le kerdişê teberê merdimîye hînî bîyê çîyê rojaneyî.Ma reyna vanê ke îşkence sûcê vera merdimîye yo. Şima do hesabê ney qetî do bidê. Bawerîya ma ya bi îqtîdarî nêmenda. Îqtîdar bêguman do bêro muhakemekerdene. Biaqîl bibê.
HDP seba demokrasîya Tirkîya çimeyê hêvî yo. Serebûtê ke hewteyê peyênî mîyanê blokanê sîyasîyan de qewimîyayê na raştîye eşkera kenê. Ma sîyaset sey çareserîye vînenê. Girîng o ke partîyê sîyasî yenê yewca pêvînayîşan kenê la nê pêvînayîşî goreyê çarçewa nîjadpereste ya îqtîdarî yenê kerdene. Ferzkerdişê neteweperestîye nêeşkeno mesekeyan çareser bikero. No meseleyanê welatî xurtêr keno, cigêrayîşê çareserîya mende nêano ca.
Ma sey HDPyî hêzê xo pêro sosyalîst, demokrat, elewî, kedkar, cinî, ciwan û nasnameyanê ke îqtîdarî teberê sîstemî de verdayê ra gênê. Na çarçewe de îtîfaqê demokrasî têna seba weçînayîşî nîyo. Ma wazenê armancê welatê demokratîkî bîyarê ca. Ma do bieşkê zemînê hemparî de bêrê yewca. Ma wazenê îtîfaqêkê tarîxî ronê ke muxalîfê wayîrwijdanî do teberê nê îtîfaqî de nêmanê.” ANQARA
