Piştî bûyerên 16’ê Cotmeha 2017’an û şûn de ku hêzên kurdî li sînorê bajarokên navçeya Xaneqînê neman, tevgera çeteyên DAIŞ’ê û komên çekdar ên nenas zêde bûye. Artêşa Iraqê jî nekarî valahiya ewlehiyê tije bike. Ev yek bûye sedem ku jiyana welatiyên li deverê bikeve di jêr metirsiyê de. Heya niha gelek welatî ji aliyê van çeteyan ve hatine qetilkirin. Her wiha bi hezaran donim zeviyên dexlûdanê cotyaran hatine şewitandin. Ji ber van sedeman welatiyên deverê ji bo xweparastinê ji neçarî çek hilgirtine.
Welatiyê bi navê Ebdulrehman Qeysî yê ji gundê Îslah yê bajaroka Gulale da zanîn ji ber metirsiya êrîşên çeteyên DAIŞ’ê ew li gundê xwe û çend gundek din ên devera Şêx Bawe heya sibehê nobetê digirin û got ku artêşa Iraqê li deverê heye lê wan naparêzin.
Gundên vê deverê nêzî robarê Sîrwan in, ji bo wê wekî welatî diyar dikin metirsiya êrîşên çeteyên DAIŞ’ê hîn zêdetir e. Welatiyan li ser banên çend xaniyek çeper çêkirine, şevane çar an pênc kes bi hevre nobetê li gundê xwe digirin.
Teha Mehmud ji gundê Feke ye diyar kir ku ew li gel gundên din ên derdorê hertim di nava peywendiyan de ne û da zanîn dema bi tevgerek ya çeteyan dihesin hemû gund hevdû agahdar dikin û bi hevre dibin alîkar û ev tişt anî ziman: “Pêwîst dike di demek zû de hêzek navxwe ji bo parastina gundan ji çeteyên DAIŞ’ê were avakirin. Ji ber ku dema ev hêz hate avakirin wê êdî çeteyên DAIŞ’ê nikaribin bi rehetî êrîş bikin ser gundan û wê welatiyên deverê jî bêtirs bikarin di malên xwe de bimînin.”
Welatiyê bi navê Rifet Dara yê ji gundê Şêrke jî da zanîn ku yek ji pirsigêkên herî sereke nebûna çek û pêdawîstiyên xweparastinê ye û ev tişt vegot: “Li gundê me 75 malên kurda hene, her wiha birayên ereb ên ji mezheba Şue jî tê de hene û metirsî li ser me tevan heye.” XANEQÎN
