Qezaya Licê ya Amedî de 24ê gulane de dewa Nenyasî de leşkeranê tirkan babîyê çar domanan Mehmet Yildirim qetil kerdbî. Hemserekê DBPyî yê Amedî Mehmet Şîrîn Gurbuzî ANFyî rê qisey kerd û da zanayene ke şarê Amedî rixmê terorê dewlete zî apey game nêeşta û wayîrê şehîdê Licê Mehmet Yildirimî vejîya.
Gurbuzî pare kerd ke îqtîdarê AKP-MHPyî her roje hêrişê kurdan keno. Gurbuzî ard ziwan ke serebûtê ke Licê de qewimîyenê parçeyê polîtîkayanê şerê taybetî yê û vat: ”Dewlete bi hawayêkê cîyayî nêzdîyê Licê beno. Xozaya Licê yena talankerdene û dewê ci yenê vengkerdene. Her roje Licê de operasyonê leşkeran û polîsan yenê kerdene. Tewr peyên operasyonêkê winayênî de Mehmet Yildirim ame qetilkerdene. Xîretê îqtîdarî bîlasebeb ê. Ê do nêeşkê bi kurdan gamêke apey bidê eştene.”
Gurbuzî îfade kerd ke şarî rixmê hêrişan zî cenazaya Mehmet Yildirimî bi sloganan defin kerda û vat: ”No mojneno ke şarê kurdî do apey game nêerzo. Dewijê ke heta serê sibayî keyeyê înan dîyabî guleyan ver, nêtersayî û wayîrê Yildirimî vejîyayî. Yanî şar wayîrê têkoşînê xo, îradeyê xo û erjanê xo vejîya. No hêriş hêrişêko destpêk nêbi û do oyo peyên zî nêbo. Ma do tim vera hêrişanê winayênan xo ver bidê.”
