Hevseroka KCD’ê Leyla Guven bi ambulansê ji Girtîgeha Tîpa E ya Amedê hate tehliyekirin. Hat zanîn ku Guven dê çalakiya greva birçîbûnê ya bêdem û bêdorveger berdewam bike
Hevseroka KCD’ê û parlamentera HDP’ê ya Colemêrgê Leyla Guven ku ji bo rakirina tecrîda girankirî ya li ser Rêberê Gelê Kurd Abdullah Ocalan ji 8’ê mijdarê ve di çalakiya greva birçîbûnê ya bêdem û bêdorveger de ye, îro di danişîna 5’emîn a doza xwe de hat tehliyekirin. Guven bi ambulansê ji Girtîgeha Tîpa E ya Amedê hate tehliyekirin. Guven da zanîn ku dê çalakiya xwe berdewam bike.
Danişîna 5’emîn a doza hevseroka KCD’ê Leyla Guven îro li 9’emîn Dadgeha Cezayên Giran a Amedê hate dîtin. Der barê Guven de îdiayên ‘Damezirandin û birêvebirina rêxistina çekdarî’, ‘propagandaya rêxistinê’ û ‘muxalefeta li dijî qanûna bi jimar 2911’ dihatin kirin. Danişîna ku tu kes tevli nebûbû de heyeta dadgehê biryara tehliyeyê da.
Li ser vê yekê di navde hevserokên giştî yên HDP’ê Pervîn Buldan û Sezaî Temellî jî, gelek parlamenterên HDP’ê, welatî û keça Guven Sabîha Temîzkan li ber girtîgehê kom bûn û xwestin ku Guven pêşwazî bikin. Leyla Guven bi ambulansê ji Girtîgeha Tîpa E ya Amedê hate tehliyekirin û derbasî mala wê ya li taxa Bagcilar a Rezan a Amedê kirin.
Têkildarî mijarê Pervîn Buldan axivî û biryara tehliyeyê bi erênî nirxand. Buldan diyar kir ku dê Guven bibin mala wê û di heman demê de diyar kir ku dê çalakiya wê bidome. AMED
