Halîse Aksoya ke esteyê lajê ci yê şehîdî Egîd Îpekî zereyê yew qutuyî de pê kargoyî dîyabî ci, bi îdîayanê îtîrafker Umît Akbiyikî amebî tepiştene. Roniştişê dewaya vera dayîke Halîse Aksoy 12ê çeleyî de (siba) Mehkemeya Cezaya Girane ya 10ine ya Amedî de do bêro kerdene.
Dayîke Halîse Aksoy rixmê nêweşîyanê xo zî bi mengan o zîndan de sey rehîne tepişîyena. Avûkata aye Zeynep Karayilane ANFyî rê qisey kerd.
Avûkate Zepnepe vist vîrî ke dayîke Halîse 25ê nîsane de bi beyananê îtîrafkerî tepişîyabi û vat: ”Îtîrafkerî îdîa kerd ke Halîse Aksoy endamê rêxistine girewtêne keyeyê xo û rêxistine rê ardim kerdêne. La îfadeyê îtîrafkerî nakok ê. La mehkeme na nakokîyî qebul nêkerdî û vat ke şehîdê eşkerayî ra ber şahîdêkê/a nimite zî est o/a. Coka mehkeme Halîse Aksoy vera nêdaye. Xora zereyê huqûqî de yew bingeyê na bire çin o.”
Avûkate Zeynepe Karayilan destpêkê prosesê muhakemekerdişî ra nata vera Dayîke Halîse huqûqê dişmenî yeno caardene û vat: ”Dosya de îfadeyê hîrê şahîdan est ê la mabênê îfadeyanê nînan de yew eleqe çin o. Hetê bînî ra îdîaname de qala lajê Halîse Aksoy Egîd Îpekî zî yena kerdene. Bi sereyê xo na rewşe mojnena ke verê Halîse Aksoy de nêzdîbîyayîşêko bêusûl est o. Halîse Aksoy 9 mengî yo zîndan de ya û tede şeker û tansîyon est ê û nêweşîyê bînî est ê. A zîndanî ra çend reyî wedarîyaye nêweşxaneyî. Pêvînayîşê ma yê peyênî de aye vat ke nêweşîyê ci giran bîyê.”
Zeynepe Karayilan pê hesna ke 12ê çeleyî de (siba) roniştişê dewaya vera Dayîke Halîse est o û vat: ”Ganî ma wayîrê nê roniştişî bibê. Ma sey avûkatanê Halîse Aksoy do uca de amade bibê. Ma venga pêro dezgehan û rêxistinanê demokratîkan û cinîyan danê ke tewrê roniştişî bibê û paştî bidê Halîse Aksoy.” AMED
