KCKyî bi eşkerayîyêka nuştekîye da pêhesnayene ke înan seba ke tehlukeyî bêrê çinkerdene, seba ke cuya azad û demokratîke bêra awankerdene Kurdîstan de û welatanê teberî de ê 12ê êlule de hamleya bi şîarê bi şîarê ‘Tecrîd, Faşîzm, Îşxalî rê Bes; Wext Wextê Azadîye yo’ danê destpêkerdene.
Eşkerayîya Konseya KCKyî wina ya:
”Serra 1991î de Saddamî Kuveyt îşxal kerd û DYA hemkaranê xo reyde mudaxeleyê leşkerî kerdî. Dima zî merkezê ci Rojhelatê Mîyanênî de Şerê 3. yê Dinya dest pêkerd û no şer 30 serran ra nata dewam keno. Rîyê welatanê kapîtalîstan ra şer vera beno derg.
Aktoranê verênan ê nê şerî ra yew zî Tirkîya ya. AKP komploya vera Rayber Apoyî ra dima qestî ra ame îqtîdarkerdene. DYA waşt nê şerî de Tirkîyaya ke îqtîdarê ci sîyasal-îslamîst o, bixebitna. DYA rolêk da Tirkîya ke PKK tasfîte bikera û kurdan qir bikera. Projeyê qirkerdişê kurdan ê Cuntaya 12ê Êlule dîya AKP.
31ê teşrîna verêne ya 2014 de bire ameye dayene ke planê çinkerdişî bêro caardene
AKPyî heta serra 2014î vera têkoşînê azadîye yê kurdan xeylêk metod û rayîrî xebitnayî. La wexto ke eşkera bi Têgêrayîşê Azadîye yê Kurdîstanî wina rasfîye nêbeno serra 2014î de Planê Çinkerdişî ame amadekerdene û 31ê teşrîna verêne ya 2014î de zî plan hetê MGKyî ra dîya destpêkerdene. Rayber Apoyî bi projeyê çareserîye yê 3 baskan xîret kerd ke nê planî asteng bikero. Hêzanê nê planî vera Têgêrayîşê Azadîye yê Kurdîstanî hêverî DAÎŞî reyde hemkarîye kerde. 7ê hezîrane de AKP, MHP û Ergenekon zî dest pê hêrişanê Têgêrayîşî kerd.
Hegemonyaya Osmanijan a Newîye
Planê Çinkerdişî yê 2014î ra dima seba ke Têgêrayîşê ma bêro tasfîyekerdene vera Rojawan û Başûrê Kurdîstanî zî îşxalî dîyayî destpêkerdene. Ame hedefkerdene ke tîya de hegemonyaya Osmanijan a newîye bêra ronayene. Dewleta tirke bi planê çinkerdişî polîtîkaya xo ya teberî vurnaye. Çunke kurdî Rojhelatê Mîyanênî de bîyêne hêzdar. Dewleta tirke armanc kerd ke kurdan qir bikera û verê înan bigêra. Ganî pêro kurdî na raştîye bivînê.
Kurdîstan werteyê Rojhelatê Mîyanênî de yo coka kurdî seba ke sey Şerê 1. yê Dinya nêrê qirkerdene Şerê 3. yê Dinya de polîtîkaya raşte teqîb bikerê û hîsger bibê. Dewleta tirke bi vatişê ‘binkewteyê Lozanî’ eşkera kerd ke a wazena erdanê Osmanijan ser o reyna serdest biba. Hedefê dewleta tirke de têna Vakur nê Rojawan, Başûr zî estê. Hêrişê dewleta tirke coka pêro kurdan eleqedar kenê. Ganî pêro parçeyê Kurdîstanî û hêzê ma yê sîyasîyî vera dewleta tirke têkoşîn bikerê.
Eke kurdî yewîya xo bironê…
Kurdî wextê Şerê 1. yê Dinya ra cîya yê bihêz ê, wayîrê hîşmendî, sîyasetê neteweyî yê. Hetê leşkerî ra zî reya verêne hende bihêz ê. Ewro serê dinya de her kesî bi sempatî ewnîyeno kurdan. Eke kurdî yewîya xo zixm bikerê, raştîya dişmenî hol fam bikerê, polîtîkaya raşte bikerê û têkoşînê bitesîrî bikerê do bibê ê neteweyî ke Rojhelatê Mîyanênî de destkewteyanê tewr pîlan do bivisno destî.
Kurdî sayê xeta Rayber Apoyî ra hende bihêz ê. Bêguman hêzanê bînan zî her parçeyê Kurdîstanî de bedelê giranî dayê û têkoşîn kerd la PKK ewro rêxistinkerdiş û têkoşînê kurdan de bi hêzê girîngî yê leşkerî, sîyasî û komelkî yê Rojhelatê Mîyanênî. Paradîgmaya ekolojîke û azadîwaştoxê cinîyan a Rayber Apoyî kurdî kerdî hêzê bêhempayî. Coka Tirkîya xîret kena ke xeta Rayber Apoyî tasfîye bikera. PDKyî zî bi heman armancî seba ke na xete bêra çinkerdene dewleta tirke reyde têkilîye naye ro. DYA zî seba menfaatanê xo yê Şerê 3. yê Dinya wazena PKK qels bikera. Nê raştîyê mojnenê ke ê çira wazenê Rayber Apo tecrîd bikerê.
PDK eke dişmenîya dewleta tirke ya vera kurdan nêvîneno mîyanê gafletêkê pîlî de yo. Dewleta tirke seba Başûrî zî tehlukeyêlê pîlî ya. Eke vera dewleta tirke bi ruhê yewîya neteweyîye têkoşîn nêro kerdene dewleta tirke do Musul û Kerkûk îşxal bikera.
Dewleta tirke Vakur de kurdan qir kena, Rojawan îşxal kena, vera Başûrî têkoşînê sîyasî û leşkerîyî kena, hêrişê hêzanê Rojhelatê Kurdîstanî kena. Kurdîstan binê îşxalêkê pîlî de yo. Eke kurdî Şerê 3. yê Dinya de bi hawayêkê aktîfî tênêgêrê do firsendêkê tarîxîyî vîn bikerê.
Eke kurdî têkoşînê hemparî sey hamle bîyarê ca eşkenê dewleta tirke bin bikerê
Dewleta tirke polîtîkaya xo ya zere û teberî qirkerdişê kurdan ser o naye ro. Eke kurdê Kurdîstanî û kurdê teberê welatî têkoşînêkê hemparî sey hamle bîyarê ca o çax eşkenê dewleta tirke bin bikerê.
Tirkîyaya ke îqtîdarê ci AKP-MHPyî ya, hêrişê kurdan, muxalîfan, hêzanê demokrasî kena la nê hêrişî do bênetîce bimanê. AKP-MHP hem qels ê hem zî vera înan de cepheyêko pîl esto. Dewleta tirke pêro cîrananê xo reyde şer kena, zere de zî xîret kena ke bi şerî payan ser o vindera. Nê polîtîkayan peynîya AKP-MHPyî arde.
Eke AKP-MHP bêrê binkerdene Rojhelato Mîyanên do azad bo
AKP-MHP bi hêrişanê xo wazenê ke verê demokratîkbîyayîşê Tirkîya, Kurdîstan û Rojhelatê Mîyanênî bigêrê. La eke îqtîdarê AKP-MHPyî bêro binkerdene têna Kurdîstan û Tirkîya nê pêro Rojhelato Mîyanên do azad bibo. Kurdî seba têkoşînê winasênî wayîrê hêzê pîlî yê. Xêta îdeolojîk û polîtîke ya kurdan îmkananê nê têkoşînî peyda kena. Eke hêzê şorişgêrî yê kurdan hêzanê demokrasîyî yê Tirkîya û Rojhelatê Mîyanênî reyde hemkarî bikerê do ser bikewê.
Ma 12ê êlule de hamle danê destpêkerdene
Verê kurdan û hêzanê demokrasî yê Rojhelatê Mîyanênî de firsendo winasên esto. Konseya ma ya Rayberişî û temsîlkarê ma yê dezgeh û rêxistinan nê esasî ser o ameyî pêser û ma tehluke û îmkanê serkewtişî ercnayî. Ma birê girîngî girewtî. Çarçewa nê biran de seba ke ma tehlukeyan çin bikerê û cuya azad û demokratîke awan bikerê 4 parçeyanê Kurdîstanî de, teberê welatî de û pêro welatan de ke tede kurdî ciwîyenê 12ê êlule de bi şîarê ‘Tecrîd, Faşîzm, Îşxalî rê Bes; Wext Wextê Azadî yo’ hamleyêke danê destpêkerdene. Na hamle hedef kena ke îqtîdarê AKP-MHP-Ergenekonî çin bikera ke no îqtîdar tecrîdê Îmraliyî vurna şerê taybetî û sîstemê îşkenceyî yê vera şarê kurdî, tedaya vera kurdan kerde giranêr.
Tecrîdê Îmraliyî yê vera Rayberê Şarê Kurdî bîyo polîtîkaya kifşe ya hêrişanê vera Têgêrayîşê Azadîye yê Kurdan û hêzanê demokrasî yê Tirkîya. Coka têkoşînê vera tecrîdî û têkoşînê seba azadîya Rayber Apoyî yeno a mana ke vera qirkerdişê kurdan têkoşînê azadîye bêro averberdene û hêzêrkerdene. Xeta polîtîk û îdeolojîke ya Rayber Apoyî mefteyê çareserî yê meseleyanê Kurdîstan, Tirkîya û Rojhelatê Mîyanênî yo. Coka azadîya Rayber Apoyî do biba netîceya tewr pîle ya na hamle.
Hamleya ‘Tecrîd, Faşîzm, Îşxalî rê Bes; Wext Wextê Azadî yo’ do her parçeyê Kurdîstanî de aver şora û ser bikewa.
Nê esasî ser o;
Vakurê Kurdîstanî
Vakurê Kurdîstanî de têkoşînê vera faşîzmê AKP-MHPyî do bino merkezê hamle. No îqtîdar kurdan qir kena û hêzanê demokrasî yê Tirkîya rê zî tedaya girane kena. Îqtîdar seba ke muxalîfê ci çin bibê tedaya xo kerde giranêr. Mehkemeyî goreyê edaletî tênêgêrenê. Mehkemeyî bîyî hacetê teda yê vera muxalîfan. Tirkîya de caardişê edaletî têkoşîno tewr pîl o. Coka Tirkîya de têkoşîn bi şîarê ‘Faşîzmî rê bes, wext wextê caardişê edaletî û awankerdişê demokrasî yo’ wa bêro caardene.
Zag girîng o ke şarê kurdî elewîyan û hêzanê demokrasî reyde têkoşînê hemparî bikero. Coka ganî kurdî wayîrê waştişanê demokrasî û azadî yê şaranê Tirekîya vejîyê. Hêzê demokrasî zî ganî vera zulmê Kurdîstanî vejîyê û seba azadîya Rayber Apoyî xîret bikerê.
Cinîyî vera îqtîdarê AKP-MHPyî xoverdayîşê pîlî kenê. Coka na hamle de zî rolê cinîyan pîl o. Na hamle do faşîzm çin bikera, rengê cinîyan eşkera bikera.
Başûrê Kurdîstanî
Destkewteyê Başûrê Kurdîstanî binê tehlukeyêkê pîlî de yê. Başûr de îşxal û hêrişê dewleta tirke estê. Bi nê hêrişan bi hemkarîya PDKyî yeno hedefkerdene ke PKK bêro tasfîyekerdene. Wezîfeyo verên ê şarê Başûrî çinkerdişî îşxalî û rijnayîşê baregehanê leşkerîyan o. Başûrê Kurdîstanî de bi şîarê ‘Îşxalî rê bes, wext wextê pawitişê Kurdîstanî yo’ hamle do bêra caardene. Ganî parçeyê bînî yê Kurdîstanî nê esasî ser o paştî bidê Başûrê Kurdîstanî. Na hamle reyde îşxalê vera Başûrî do çin bibo, tecrîd do bêro wedaritene û pêro parçeyanê Kurdîstanî de azadî do bêra ronayene. Coka Başûrê Kurdîstanî de çinkerdişê îşxalî û pawitişê Kurdîstanî merkezê hamle yê.
Rojawan
Rojawanê Kurdîstanî de hamle do bi şîarê ‘Îşxalî rê bes, wext wextê pawitişî yo’ bêra caardene. Parçeyêkê Rojawanî binê îşxalê dewleta tirke de ya. La reyna zî dewleta tirke gef wanena ke a do pêro Rojawan îşxal bikera. Dewleta tirke tim hêrişê Rojawanî kena û bi nê hawayî wazena Şorişê Rojawanî birijna. Şorişê Rojawanî têna bi xoverdayîşê vera îşxalî û têkoşînê vera faşîzmê AKP-MHPyî do bêro pawitene. Şorişê Rojawanî hetê şarê Kurdîstanî, cinî, ciwan û hêzanê demokrasî yê dinya ra yeno paştîdayene. Şarê Rojawanî do tewrê na hamle bibo, îşxalan çin bikero û şoriş bipawo. Bi çinkerdişê îşxalî Şorişê Rojawanî teqez do bêro pawitene. Şorişê Rojawanî do Sûrîye bikero demoktratîk û bibo îlhamê demokratîkbîyayîşê Rojhelatê Mîyanênî.
Rojhelat
Rojhelatê Kurdîstanî hamle do bi şîarê ‘Dardekerdişan rê bes, wext wextê demokrasî yo’ bêra caardene. Eke dardekerdiş bêro wedaritene Îran de wayûbiratîya şaran do bêra caardene û Kurdîstano azad do bêro ronayene. Ewro pêro parçeyanê Kurdîstanî de dişmeno verên û esil dewleta tirke ya. Hîşmendîya faşîst û kolonyalîste ya dewleta tirke wexto ke bêra binkerdene têna Vakurê Kurdîstanî de nê pêro parçeyanê Kurdîstanî de seba azadbîyayîşî gamê pîlî do bêrê eştene. Astengîya vera demokratîkbîyayîşê Rojhelatê Mîyanênî zî do bêra wedaritene.
Ewropa û teberê welatî
Sere de ê Ewropa şarê ma yo ke teberê welatî de yo, rayberîya cinî û domanan de do bibê hêzê averberdişî yê na hamle. Şarê ma yê welatê teberî bi rêxistinbîyayîşê xo têkoşînê kurdan pêro dinya ra vila kerd. Ewropa û teberê welatî de hamle do bi şîarê ‘Rayber Apoyî rê azadîye, wext wextê çinkerdişê îşxal û qirkeridan o’ bêra caardene. Şarê ma do seba serkewtişê na hamle wezîfeyê xo bîyaro ca.
Hêzo esas ê hamle; gerîlayî
Bêguman gerîlayê azadîya Kurdîstanî na hamle de do ca bigêrê û darbeyan bidê hêzanê faşîstan ro. Xoverdayîşê Heftanînî çarçewa na hamle de do bêro pîlkerdene. Gerîlayî her ca de vera îşxal û tecrîdî têkoşîn bikerê û azadîya Rayber Apoyî bîyarê ca. Gerîlayî do bi têkoşîn û estbîyayîşê xo rayîr nêdê ke kolonyalîstî biresê armancanê xo. Nê esasî ser o zî seba azadîya Rayber Apoyî, azadîya Kurdîstanî û demokratîkbîyayîşê Rojhelatê Mîyanênî rolê xo bîyarê ca.
Cinî û Ciwanî
Ciwan û cinîyê çêrî yê Kurdîstanî,
Cinî û ciwananê Kurdîstanî tim îspat kerd ke ê rayberê têkoşînê azadîye yê. Na hamle de rolêko pîl keweno milê şima ser. Cinîyê kurdê ke tewrê têkoşîn û xoverdayîşî bîyî, bi fedakarî şer kerd, pêro dinya de bîyî çimeyê modelî yê azadîye.Cinîyê kurdî vera sîstemê serdestîya camêrdan zî têkoşînê pîlî kenê. Cinîyê ruhê têkoşînê vera tecrîd, îşxal û qirkerdişî yê. Cinîyê kurdî bi ne ruhî do hamle de rolêkê tarîxîyî bîyarê ca û vernîya têkoşînî de ca bigêrê.
Ciwanê kurdî do her safhaya hamle de bi hawayêkê aktîfî ca bigêrê. Ciwanî vera îşxal û hêrişan do bibê hêrişê şarî û fedayîyê Rayber Apoyî. Ciwanî kuçe û meydanan de bi hawayêkê aktîfî ca bigêrê û bimojnê ke Rayber apo nêno esîrkerdene, Kurdîstan nêno îşxalkerdene û şarê kurdî nêno qirkerdene.
Şarê Kurdîstanî
Şaro welatperwer ê Kurdîstanî,
Senî ke dewleta tirke bi cuntaya 12ê Êlule xîret kerd ke kurdan qir bikera nika zî îqtîdaro faşîst ê AKP-MHPyî wazeno ke têna Vakur nê pêro Kurdîstan îşxal bikero, kurdan tarîxî ra biestero. Na hîşmendîya Şerê 3. yê Dinya xo rê sey firsendêk vînena û vera kurdan her tewir hêrişan kena. Nika ma qirkerdişê topkeyûnî reyde têrî yê. Ganî ma ewro bi ruhê Hayrî Durmuş, Alî Çîçek, Kemal Pîr û Akîf Yilmazî têbigêrê û nê hêrişanê qirkerdişî her parçeyê Kurdîstanî de bin bikerê. Coka ewro şarê ma her cayê Kurdîstanî de û teberê welatî ra wa tewrê hamleya ‘ Tecrîd, Faşîzm, Îşxalî rê Bes; Wext Wextê Azadî yo’ bibo.
Hêzê sîyasîyî yê pêro parçeyan
Hêzê sîyasîyî yê pêro parçeyanê Kurdîstanî;
Dewleta tirke seba ke kurdî wayîrê serkewtiş û destkewteyan nêbê hêriş, îşxal û qirkerdan dewam kena. Nê prosesî de wezîfeyo esas ê hêzanê sîyasîyan ê kurdan o ke yewîya xo bîyarê ca, vera dişmenî têkoşînê hemparî bikerê. Nê esasî ser o ma venga pêro hêzanê sîyasîyan ê 4 parçeyanê Kurdîstanî danê ke bi ruhê yewîya neteweyîye tewrê hamleya ma bibê.
Hêzê demokratîkî
Hêzê demokratîkî yê Rojhelatê Mîyanênî;
Hamleya ma ya vera îqtîdarê faşîstî yê AKP-MHPyî do biba têkoşînê azadî û demokrasî yê şaranê Rojhelatê Mîyanênî. Ma venga şima danê ke bi îmkananê xo tewrê na hamle bibê. Eke AKP-MHP birijê şima do bi lezêrî biresê hedefanê xo yê azadî û demokrasî.
Şarî û hêzê demokrasîyî
Pêro şarê bindest û kolonyalî û hêzê demokrasîyî,
Têkoşînê vera faşîzmê AKP-MHPyî têna têkoşînê demokratîkbîyayîşê Rojhelatê Mîyanênî nîyo. Eke Rojhelato Mîyanên demokratîk bibo têkoşînê azadî û demokrasî yê dinya zî aber şoro. Nê esasî se ro ma venga şima danê ke bi hawayêkê xurtî tewrê hamleya ma bibê û paştî bidê na hamle.” Çime/ANF
