Hozan Diyar Dersim ji bo balê bikişîne ser berxwedana greva birçîbûnê bi navê “Haydê” stranek derxist û bi klîbekê li ser YouTubeyê parvekir. Di stranê de bal kişandiye ser bêdengiya cihanê ya li hemberî berxwedanê û ji bo şikandina tecrîdê îşaret bi hêza gelê kurd dike
Çalakiya greva birçîbûnê ku beriya pênç mehan ji bo rakrina tecrîda li ser Rêberê Gelê Kurd Abdullah Ocalan, bi pêşengiya Hevseroka KCD’ê û Parlamentera Colemêrgê Leyla Guven hat destpêkirin, di meha şeşan de didome. Girtiyên ji doza PKK û PAJK’ê girtî jî di nav de li welat û derveyî welat bi hezaran kes tevlî vê berxwedanê bûne û ji bo rakirina tecrîda li ser Ocalan laşê xwe dane ber birçîbûnê. Duh ji aliyê girtiyan ve berxwedan ket qonaxeke din û wergeriya rojiya mirinê.
Berxwedana ku bi biryardarî didome, li gel bandora xwe ya siyasî, bandoreke hûnerî jî afirandiye û ji bo hunermendên kurd bûye çavkaniya stranan. Di demên dawîn de ji aliyê hunermendên kurd ve li ser berxwedanê gelek stran hatin çêkirin. Herî dawî hunermendê kurd Hozan Diyar Dersîm jî ji bo balê bikişîne ser berxwedanê stranek li van stranan zêde kir û bi navê “Haydê” stranek derxist. Strana ku gotin û muzîka wê Hozan Diyar Dersim çekiriye, aranjeya wê jî Mazlûm Adibellî çêkiriye.
Strana ku hat amadekirin ji aliyê Diyar Dersim Official ve bi klîbekî li ser YouTube hat parvekirin. Diyar di klîba xwe de cih daye wêne û dîmenên berxwedêran û mudaxaleyên polîsan ên li dijî çalakiyên pişrgitiriyê yên ji bo berxwedanê. Hozan Diyar di naveroka strana xwe de jî bal kişandiye ser bêdengiya cihanê ya li hemberî berxwedanê û girîngiya piştgiriya berxwedanê. Her wiha ji bo şikandina tecrîdê îşaret bi hêza gelê kurd dike û bi gotinên hunerî bang li gelê kurd dike.
Gotinên stranê bi giştî wiha ne;
Heta kîngê bimînî li benda dinyayê
Dinya kor e, ker e, lal e kêrî me nayê
Derman bikin birînin xwe em bi destê xwe
Haydê haydê lo bira
Haydê haydê lê xwengê
Îro roja xîretê sibe gelek dereng e
Haydê haydê lo bira
Haydê haydê lê xwengê
Ku îro ser hilnedî sibe gelek dereng e
Em dikarin zindana Îmraliyê bişikînin
Em dikarin kela zilmê tevde hirşînin
Bawer bikin bi hêza xwe em ê ser kevin
Haydê haydê gelê me
Haydê haydê birayê me
Bo me gelekî şerm e serokê me girtî be
Haydê haydê gelê me
Haydê haydê birayê me
Bo me gelekî şerm e ew faşîzm li ser me
Em ê ala berxwedanê hê bibin banî
Em ê bikin dijmin çokan li ber me daynî
Em ê bêjin xwînxar êdî tu gihîşte dawî
Haydê haydê hinik ma ew faşîzm hilweşê
Dîktator wê çok daynî gel bi azadiyê şabê
Haydê haydê hinik ma ew faşîzm wê hirêşê
Dîktator wê çok daynî gel bi azadiyê şabê
Kesên bixwazin xwe bigihînin stranê û guhdar bikin, dikarin li ser vê lînkê stranê guhdar bikin; https://www.youtube.com/watch?v=EBGkOhMv35I
