Navenda Nûçeyan |
Meclisa Gel û Baweriyan a HDK’ê bi wesîleya salvegera Komkujiya Zîlanê daxuyaniyek weşand.
Di daxuyaniyê de hate diyarkirin ku bi avabûna komarê re di sala 1922’yan de soza xweseriyê ya ku ji kurdan re hatiye jibîrkirin û li ser zihniyeta yekperest Destûra Bingehîn a 1924’an hatiye amadekirin û wiha hat gotin: “Sala 1925’an Şêx Seîd li ber vê rabû. Piştre jî Qanûna Takrîrî Sukûn û Dadgehên Serxwebûnê hatin avakirin. Bi hezaran mirov hatin darvekirin û sirgûnkirin. Û bi hezaran jî reviyan.”
Di daxuyaniyê de hate ragihandin ku 13’yê Tîrmeha 1930’î li Agiriyê êrîşeke leşkerî dest pê kir û di nava du hefteyan de bi hezaran mirov hatin kuştin.
HDK’ê diyar kir ku li gorî rojnameya Cûmhûriyetê 15 hezar, li gorî hin çavkaniyan jî 47 hezar kes di komkujiyê de hatin kuştin û bi bîr xist ku rojnameyan ji bo komkujiya Zîlanê gotine ‘Geliyê Zîlanê bi cesedan tijî bû’.
Meclisa Gel û Baweriyan a HDK’ê qurbaniyên Komkujiya Zîlanê bi bîr anî û diyar kir ku zîhniyeta tekperest jî têkoşîna gelê kurd jî didomin.
