Hemsereka HDPyî ya Amedî Hulya Alokmen Uyanike seba mîtîngê ‘Vera şerî de çareserîya demokratîk’ ke do 22ê Temmuze de pê bêro, vengê terbîyayîşê mîtîngî kerde
Rêxistina Partîya Demokratîke ya Şaran (HDP) ya Amedî bi siloganê ‘Vera şerî de çareserîya demokratîk’ 22ê temmuze de bajarê Amedî de mîtîngêk pê ana. Rêxistina HDPyî derheqê babete de awanîya HDPyî de kombîyayîşê çapemenî viraşte. Nameyê Komîteya Amadekar yê mîtîngê ser Hemsereka HDPyî ya Amedî Hulya Alokmen Uyanike qisey kerde û vengê terbîyayîşê mîtîngî daye her kesî. Hulya Alokmen Uyanike her kesê ke aştî û demokrasî wazenî ra waşte ke tewrê mîtîngê 22ê temmuze bibî û dormeyê xo zî tewrê mîtîngî bikerî.
Uyanike qiseykerdişê o de wina va: “Hema zî cenazeyê leşker, polîs û gerîlayan yenî. Seba ke rêxistinê demokratîk û komeleyê komelkî yê Amedî vera şer û cenazeyan de îtîrazanê xo bîyarî ziman ser, ma do Amed de mîtîng bivirazî. Vera polîtîkayê şerî de çareserîya demokratîke lazimîya ferz a. Ma do bi nê fehmî 22ê temmuze de Raşteyê Îstasyonî yê Amedî de saet 17.00î ra heta 20.00î mîtîngêk pê bîyarî. Hemserokê Partîya Demokratîke ya Şaran (HDP), Partîya Herêmê Demokratîkî (DBP), Kongreya Komela Demokratîke (KCD), Kongreya Demokratîke ya Şaran (HDK) û Partîya Sosyalîstanê Bindeste (ESP) do tewrê mîtîngî bibî.”
Her kesê ke mîyanê komîteya amadekar de ca gênî do tîya ra pê raşte, kuçe û taxan de mîyanê xebatan de ca bigêrî. AMED
