Ş
Li gorî îdiayan li ser fermana Walîtiya Sêrtê qeyda welatiyan a ji bo hilbijartina herêmî nehat çêkirin û tenê qeydên cerdevanan hatin çêkirin. Der barê mijarê de parlamenterê HDP’ê yê Sêrtê Siddik Taş diyar kir ku dê dev ji vê yekê bernadin û dê serî li YSK’ê bidin
Desteya Hilbijartinê ya Bilind (YSK) ji bo guherandina cihê qeydên hilbijartinê daxuyandibû ku roja dawî 31’ê kanûna 2018’an e. Welatiyên heta 31’ê kanûnê serî midûriyetên nifûsê yên bajar û navçeyan dan, ji bo dengdayîna hilbijartina herêmî ya 31’ê adarê cihê xwe yê qeydê guherandin. Lê belê li Midûriyeta Nifûsê ya Sêrtê rewşeke cuda derket. Welatiyên ji bo guherandina navnîşana xwe di 31’ê kanûnê de serî li midûriyeta nifûsê dan, peywirdaran ji wan re got ‘li gor fermana hatiye dayîn em nikarin tiştekî bikin.’ Ji ber vê welatiyên ku nikaribûn qeyda xwe çêbikin, serî li HDP’a Sêrtê dan.
Têkildarî mijarê parlamenterê HDP’ê yê Sêrtê Siddik Taş diyar kir ku di 31’ê kanûnê de welatî li wî û partiya wan geriyane û rewşa heyî ragihandine û wiha got: “Di roja dawî 31’ê kanûnê de welatî serî li Midûriyeta Nifûsê ya Bajêr didin lê bêyî ku qeyda wan bê çêkirin wan dişînin. Lê belê welatiyan diyar kirin ku wê rojê qeydên cerdevanan hatiye çêkirin. Li ser vê ez li midûrê nifûsê geriyam, paşê jî ji bo rû bi rû hevdîtinê pê re çêbikim çûm cihê wî lê gotin ‘walî gazî wî kiriye’. Ne li cihê xwe bû.”
Her wiha Taş destnîşan kir ku ew li midûriyeta nifûsê ji karmendekî pirsî ka ji bo çê qeyda welatiyan çênekirin û axaftina xwe wiha bi dawî kir: “Karmend ji min re got ‘ez karmend im, ez li gor fermana midûr karê xwe dikim, got hûn ê nekin me jî nekir.’ Lê em ê dev ji vê yekê bernedin. Em ê lêkolîn bikin ka walî fermaneke wisa daye yan na. Paşê jî em ê serî li YSK’ê bidin.” SÊRT
