HDP, HDK, KCD û DBP, Amed de hempar peyam da: “Şarî Newroze de musna ke ê do vile ronênê. Ganî tecrîd bêro wedaritene. Hîna ke netîceyê xirabêrî nêbîye vengê xo berz bikerê.”
Hemserekê Pêroyî yê HDPyî Pervîn Buldane, Sezaî Temellî, hemverxatoxa HDKyî Gulîstan Kiliç Koçyîgîte, hemserekê Pêroyî yê KCDyî Berdan Ozturk û hemserekê Pêroyî yê DBPyî Mehmet Aslanî Amed de kombîyayîşê çapemenîye viraşt. Kombîyayîşî de xurtbîyayîşê Newroze, grevê vêşanîye yê ke dewam kenê û derheqê çalakîyan ê fedaîyan ê hepisxaneyan de ercnayîşî ameyî kerdene.
Mîlyonan peyamê zelalî dayî
Eşkerayîya hempar a ke kombîyayîşî ra dima ameya kerdene wina ya: “Pîrozkerdişê Newroze de çîyêko xirab neqewemîya û bi girseyan ê girdan ameyî viraştene. Rixmê zext, zor û astengkerdişan bi mîlyonan kesî sere de Amed, Wan Stembol û hîna xeylî bajar û qezayanê ma de peyamê zaf zelalî dayî. Sere de şarî Kurd û heme hêzanê demokrasî cewabê heqeretanê îqtîdarî û vatişê înan ê ‘Nê erdan ser o cayê şima çin o’ dayo. Ma tîya yê, qerardar ê, bihêvî yê; ma têkoşînê demokrasî, azadîye, edalet, têduştîye û haştîye ra fek nêverdanê ra vato. Girseyî faşîzmê AKP û MHPî ra vato, ma vera polîtkayanê to sereyê xo çewt nêkenê û 31ê Adare de ma do qeyûman bişawê cayê ke ci ra ameyî. Bi vengêko berz ameyo vatene ke ê do tecrîdî qebûl nêkerê û ê girêdayîyê erjanê xo yê, seba naye zî ma heme şarê xo rê sipas kenê.
Şar êdî sebir nêkeno
Îmraliyî de serê rêzdar Abdullah Ocalanî de 4 serrî yo tecrîdêko giran esto. Seba wedaritişê nê tecrîdî grevê vêşanîye ameyî destpêkerdene. Çakalîya Leyla Guvene roja 139ine de û girewteyan zî 101 rojî xo pey de verdayî.
No tecrîd 4 serrî û 1460 rojî yo dewam keno. No tecrîd vera heqan û peymanameyanê mîyanneteweyan ê ke Tirkîya îmza eşta binê. Serdestî, Wezaretê Edaletî û Wezaretê Karê zereyî zî mîyan de heme selahîyetdarî bêveng ê û bêvengîya înan sebrê merdiman teng keno. Nê 10 rojanê peyênan de hepisxaneyan ra 4 cenazayî vejîyayî. 4 girewteyanê sîyasîyan seba protestokerdişê tecrîdî çalakîya fedaîye kerde. Almanya de zî kesêk vera tecrîdî xo veşna û çi heyf ke nêame xelisnayene.
Bêveng nêmanê
Ma reya bîne vengdayîş bi rayapêroyî, heme kesanê wayîrê wijdanî, rêxistinanê cimatî yê sîvîlî, partîyanê sîyasîyan û sendîkayan rê kenê. Bêveng nêmanê. Seba ke tewr kesêk zî cuya xo ra û weşîya xo ra nêbo, paştdayîş bidê cehdkerdişê ma. Seba ke çîyêko xirab nêqewemîyo vengê xo berz bikerê. Ma pîya eşkenê nê prosesî derbaz bikerê. Ganî Îmraliyî de pêvînayîşê avûkat û keyeyan bêrê kerdene. Ma reya bîne vengdayîş bi serdestan kenê, heqanê huqûqî û qanûnan asteng nêkerê û tecrîdê girankerdeyî yê 4 serran biqedênê.” AMED
