HDP ji bo balê bikişîne ser tecrîda girankirî ya li ser Ocalan û çalakiyên ku bi pêşengiya hevseroka KCD’ê Leyla Guven hatine destpêkirin, dê bi dirûşma; ‘Demokrasî, Azadî û Edalet’ li Amed û Stenbolê mitîngan li dar bixe
Hevseroka KCD’ê û parlamentera HDP’ê ya Colemêrgê Leyla Guven bi daxwaza tecrîda li ser Rêberê Gelê Kurd Abdullah Ocalan were rakirin 57 roj in di greva birçîbûnê ya bêdem û bêdorveger de ye. Bi heman armancê li 23 girtîgehan 91 girtî û li Strasbourgê 15 kes 3 hefte ne di greva birçîbûnê de ne. Çalakiyên greva birçîbûnê li Hewlêr, û Silêmaniyê jî dewam dikin.
Partiya Demokratîk a Gelan (HDP) bi armanca balê bikişîne ser tecrîda girankirî ya li ser Rêberê Gelê Kurd Abdullah Ocalan û çalakiyên grevê birçûbûnê yên ku bi pêşengiya Leyla Guven ji bo rakirina tecrîdê hatine destpêkirin, dadikeve qadan.
Di vê çarçoveyê de dê di 19’ê mehê de li Amed û Stenbolê bi awayekî girseyî mitîngên herêmî li dar bixe. Ji bo ku her du mitîng jî bi girseyî derbas bibin, hem li Tirkiyeyê û hem jî li bakurê Kurdistanê ji niha ve amadekariyên mitîngan hatine destpêkirin.
Ji bo mitînga Amedê dê ji sibê heta 8’ê mehê li hemû navçe û bajarên bakurê Kurdistanê, civînên gel bên lidarxistin. Wek naverok di van civînan de tecrîd û çalakiyên greva birçîbûnê bên nirxandin û di dawiya civînan de gel ji bo mitîngê bê vexwendin.
Li gorî agahiyên hatin bidestxistin dê mitîng bi dirûşma “Demokrasî, Azadî û Adalet” bên lidarxistin û hevserokên HDP’ê Pervîn Buldan û Sezaî Temellî jî beşdarî mitîngan bibin. Di rojên pêş de dê ji aliyê HDP’ê ve têkildarî mitîngan agahiyên berfirehtir bên dayîn.
