Merkezê Koordînasyonê Krîzî yê Partîya Demokratîke ya Şaran (HDP) merkezê partîye de derheqê erdlerzî de eşkerayîye daye. Mahfuz Guleryuzî ke kombîyayîşê çapemenîye de qisey kerd, derheqê xebatanê xo û kêmayîyanê warî de zanayîş da.
Guleryuzî vat: ”Çîyo ke herêmanê erlerzî de qewimîyeno, îqtîdar cara eqsê nê de qisey keno. Rewşa raşte zaf cîya ya, rewşe xidar a. Cayê ke heme qet hetkarî nêrasaya ci est ê. Goreyê telefonê ke ma rê yenê bi hezaran kesî hema binê rijnayîşî de yê. Çi heyf ke her hele hûmara kesanê ke dinyaya xo bedilnenê, zêdîyena. Mudaxaleyî qîm nêkenê. Şar binê rijnayîşî de qederê xo rê ameyo caverdayene. Ma vînenê ke xebata AFADî nêvejana.
Ma pîya bi yewîyanê koordînasyonî, heyetî şawitî herêmanê erdlerzî û hetkarî organîze kerde. Ma lîsteyê hewcedarîyanê lezebezî medyaya sanale ra vila kerdî û pîya bi şarê xo torrê paştîdayîşî nayî ro. Hem teber hem zereyê welatî ra hetkarî yena. Heta nika bi seyan tir, kamyon û kemyonetê hetkarî resayê waranê erdlerzî, ya zî tay mendo biresê ci. War de hendê 2 hezar kesan zerrîwazê ma estê. Îqtîdar nêwazeno çew hetkarî bikero û bi xo zî heqê nê karî ra nîno. Ma eşkera vajê îqtîdar binê rijnayîşî mend. îqtîdar mergan sey qederî hesibneno û eşkerayîyanê xo de şarî tehdît keno. Tecrubeyanê dinya ra ma dî ke; afatê xozayîyî qeder nîyê.
Bacê erlerzî çarçur kerdî, goş nêda merdimanê zanîstî û tedbîrî nêgirewitî, îxaleyê înşîatî dayî merdimanê xo, cayo ke vat nêbeno de bînayî viraştî, mîlyar dolarî semedê şerî xerc kerdî, wextê rijnayîşî de binate ra bîyî vînî,cayanê kombîyayîşî yê erdlerzî de AVMyî viraştî, no qeder o? Nê no qeder nê cînayet o.
Ma cehd kenê ke wa hîni çew memiro, ma pê xurtkerdişê paştîdayîşî nê rojanê tarîyan xo dima verdê. Ma pêro pîya eşkenê na derbe bipêşê. Merdimê qederê xo rê ameyî caverdayene, fehmê merkezperestî rijîya, ma pê paştîdayîşê komelkî derban pêşenê.
Nika problemo tewr pîl cayêmendişî yo, vêşanîye ya. Çi heyf ke vizêrna hinî problemê arêdayîşê cenazayan est o. Şar serê rijnayîşan de semedê xelisnayîşê merdimanê xo paweno. Makîneyî karî, ekîpmanê teknîkî hewce kenê. Çîyo ke destê ma ra yeno ma kenê. Ma pîya bi dezgehanê komelê sîvîlî û partîyanê sîyasîyan ê bînan nê karî kenê. TMMOB, KESK, DÎSK û şaredarîyê cîyayî war de yê û ma kenê înan reyde na xebate koordîne bikerê.”
