23ê nîsane de hetê Şaredarîya Stenbolî ra broşurêk ame vilakerdene ke serê ci de îmam, haham, papaz û pîrêkê elewîyan estbî. Broşurî ra dima nîqaşê derheqê elewîyan de dest pêkerd. Hetkara Hemserekanê Partîya Demokratîke ya Şaran (HDP) ya Komîsyonê Bawerî û Şaran ra Berpirsîyare Tulaye Hatîmogullari derheqê babete de eşkerayîyêka nuştekîye daye.
Eşkerayîya Tulaye Hatîmogulari wina ya: ”Heqê Dîyanetî û Serekkomarîye çin o ke şarî rê bawerîyêke bidê ferzkerdene. Ma vînenê ke rayaumûmîye de derheqê bawerîya elewîyan de muneqeşayêko cîyaker yeno kerdene. Na hîşmendîya ke wazena rîtuelanê bawerî û tewirê cuye yê hemwelatîyanê elewîyan bivisna binê bawerî û kulturê serdestî elewîyan dejnena. Partîya ma têkoşîn kena ke elewîyî senî wazenê o qayde biciwîyê. Waştişê hemwelatîya têdûşte yê elewîyan ganî mabênê îdareyanê herêmîyan û Serekkomarîye de nêbo malzemeyê polemîkan. Tarîxê komare sey vera pêro nasnameyan vera nasnameyê elewîyan zî teda kerde. Ne Serekkomar ne zî dîyanet eşkeno bire bido ke komelêk bawerîya çita bikero, senî biciwîyo.
Dîyanetî vera endamanê LGBTÎ+ vatişê cîyakerî ardî ziwan. No nêzdîbîyayîş raşt nîyo. Dîyanetî çira derheqê hêrişê vera goristanan de çîyêk nêvat? Ganî Dîyanet tewrê polîtîkayanê îqtîdarî nêbo. Exlaq zî wijdan zî hewceyê no yo.” ANQARA
