Heyetê Rayberdişê Merkezî (MYK) yê Partîya Demokratîke ya Şaran (HDP) derheqê operasyonanê serê sibayî yê vera rojnameger, sîyasetmedar, huqûqnas, sendîkavan, hunermend û xeylê kesê bînî ke 100 kesî ra zêde tenî ameyî destbendkerdiş de eşkerayîyêke nuştekî weşana.
Eşkerayîye de wina ame vatiş: “Îqtîdarê AKP-MHPyî ke erefeyê gird yê têkşîyayîşê xo yê weçînayîşî de yo, mîyanê ters û xewfî de hêrişê xo yê vera partîya ma, rêxistinê komelê sîvîlî hêzê çalak yê komelî û muxalefetî dewam keno. Ewro hetê serê sibayî çarçeweya tehqîqato ke merkezê ci Amed bî de 21 bajaran de operasyonê destbendkerdişî ame kerdiş. Hêrişan de Hetgira Hemsereka Pêroyî ya partîya ma Ozlem Gunduz, endamê MYKyî yê ma Mahfuz Guleryuz, endamê me, rojnameger, huqûqnas û hunermendî zî mîyan de tewr tay 100 kesî ameyî destbendkerdiş.”
Dewamê eşkerayîye de wina ame vatiş:
“AKP-MHP seba ke terseno weçînayîşan de bin bikewo hêrişê HDP, rêxistinanê komelê sivîlî, muxalîfan û dînamîkanê komelî keno. AKP-MHPyî pê nê operasyonan vera weçînayîşanê 14ê gulane prosesêkê darbe yo newe dayo destpêkerdene. Nê operasyonî seba xespkerdişê îradeyê şarî û sindoqan ê. Nê operasyonî tesadûfî nîyê. AKP-MHP nika keno ke pê polîs û mehkemeyan mudaxeleyê weçînayîşan bikero. AKP her ke şino hîna zaf hêriş keno la do nêeşko biinkewtişî ra bixeliso. Nê hêrişî qetî do ser nêkewê. Nê operasyonî do peynîya ci bîyarê.
Îqtîdarê AKP-MHPyî ke her ke vînî keno hîna hêrişkar beno, her ke hêrişkar beno hîna zêde vînî keno; se bikero zî do nêeşko xo aqubeto ke paweyê ci yo ra bixelisno. Nê hêrişê hewldayîşê peynî yê AKPyî yî û do bi tu hawayêk nêeşko netîce bigêro. Do cewabê nê hêrişan tewr xurt şarê ma û heme dormeyê komelî yê ke yenê tehdîtkerdiş serê sindoqan de bidî. AKP bi operasyonê Amedî hewl dano vernîya awa ke herikîyena bibedilno. La do bi wesîleya îradeyê şarî tarîx ra bêro çinîkerdiş.
Ma venga pêro kesan danê ke vera nê sîstemê şantaj û gefwerdişî tewirêkê raştî bimojnê, bi mesuldarî têbigêrê, tewrê karanê weçînayîşî bibê û vera na darbe bi aktîfî têbigêrê. Ma tîya de yê û qetî ser bikewê. Vengê ma her kesî ra no yo ke wa wayîrê sindoqan bivejî û vera darbeyan zî bi hawayêk aktîf tewrê têkoşînî bibî. Ma tîya de yî û do tesilî ser bikewî.” ANQARA
