Partîya Demokratîke ya Şaran (HDP) derheqê Qirkerdişê Zindanan yê 19ê Kanûne de eşkerayîyêka nuştekîye daye û va: “Hema zî îşkence û têgêrayîşê xirabî yê vera merdimîye dewam kenê, zindanan de merg esto.”
Vervatoxa Komîsyonê Heqanê Merdiman û Huqûqî yê Partîya Demokratîke ya Şaran (HDP), endama MYKyî û parlementera HDPyî ya Êlihî Ayşe Acar Başaran bi wesîleya Qirkerdişê Zindanan yê 19ê Kanûne eşkerayîyêk dayî.
Eşkerayîya nuştekîye de ame vatene: “20ê teşrîna verêna 2000î de zindananê Tirkîya de tepişteyan vera zindananê tîpê Fyî û bi 19 waştişan dest pê grevê vêşanîye kerdibi. Tay tepişteyan roja 45. a grevê vêşanîye de seba ke waştişê înan nêameyî ca dest pê rojeyê mergî kerd.Hetê îqtîdarê ê çaxî ra waştişê tepişteyan ameyî peygoşkerdene. 19ê kanûne de serê sibayî saete 04:30 de heman wextî de vera 20 zindanan operasyonêk dîya destpêkerdene.
Nê operasyono de ke sey ‘agêrayîşê cuye’ ame namekerdene çekê giranî, wesayîtê karî, madeyê kîmyewîyî, helîkopterî û bombayê gazî ameyî xebitnayene. Zindanî ameyî qulkerdene, ber û dêsê ci ameyî şikitene û bi hawayêkê barbarî hêrişê tepişteyan ame kerdene. Nê hêrişan de leşkeran, gardîyanan, polîsan bi hetkarîya kontragerîlayan 30 tepişteyî qetil kerdî û bi sayan tepişteyî zî birîndar kerdî.
Qirkerdişê 19ê Kanûne ra dima 19 serrî vîyartî la hema zî zindananê Tirkîya de binpaykerdişê heqanê merdiman dewam kenê. Îşkence û muameleyê xirabî benê zêde, zindanan de mergî benê zêdêr. Seba ke 19ê kanûnêka bîne nêba ganî pêro selahîyetdarî û îqtîdar naye xo rê sey dersêk bigêrê. Zindanan de ê nêzdîbîyayîşê pêroyî yê ke vera rûmetê merdimîye yê cade bêrê qedînayene.” ANQARA
