Heyetê Merkezê Rayberdişî yê HDPyî û Heyetê Merkezê Rayberdişî yê DBPyî bi eşkerayîyêke Roja Kobanê ya Dinya ya 1ê Teşrîna Peyêne selam kerde. Eşkerayîyî wina yê:
HDP: DAIŞo ke bibi belaya şaran 8 serrî verî Kobanê de ame binvistene û no serkewtişê vera DAIŞî bi îsbat ke şarî do azadîye ra fek vera medê û koletîye qebul mekerê. Xoverdayîşê Kobanê sey xoverdayîşê cinîyan zî tarîx de cayê xo girewt. Ewro sloganê ‘Jin, Jiyan, Azadî’ pê nê kedan pêro dinya de sey sloganê azadîye zimîyeno. Ruhê Kobanê bi ruhê azadîye, hêvî û kelecanê dinya. Rixmo ke 8 serrî derbaz bîyê ewro Efrîn de sey ê DAIŞî cergê ke DAIŞî xurt kerdî, bi rehetî gêrenê. Vera şaranê Kobanê û Rojawanî gefî dewam kenê. Bi Dewaya Kobanê têna partîya ma nê pêro terefgîranê azadîye zî yenê tehdîtkerdene.
DBP: Xoverdayîşê Kobanê têkoşînê mîyanneteweyî de bi yew û pêro dinya rê vila bi. No hêvîya mazlûman bi. Serewedaritişê Rojhelatê Kurdîstanî zî îsbatê ney o. Xoverdayîşê Kobanê seba şarê kurdî serebûtêko zaf girîng bi. Îqtîdarê AKP-MHPyî pê destek û destûrê hêzanê mîyanneteweyîyan Girê Sipî, Efrîn û Serêkanîyê îşxal kerdî, pê cergan nê cayî talan kerdî û keno ke demografîya nînan zî bivurno. Ma roja Kobanê ya Dinya fîraz kenê. Ma venga partîyan, rêxistinan û şarê kurdî danê ke vera nê hêrişan tewirêkê xurtî bimojnê, şarê kurdî wa wayîrê erj û destkewteyanê xo vejîyo. Ma serê Kobanê ra ver bi azadîye şinê.
