Partîya Çep a Keske û HDPyî weçînayîşan ra dima seba ercnayîşê netîceyanê ci prosesê kombîyayîşanê şarî dabi destpêkerdene. Endama Heyetê Rayberdişê Merkezî yê HDPyî Elîf Bulute prosesê kombîyayîşanê şarî û peyê ci ANFyî rê ercna.
Bulute da zanayene ke înan hêverî mîyanê meclîsê partîye, hemserekan, îdarekaran de ercnayîşî kerdî. Bulute vat: ”Naye ra dima ma derbazê prosesê kombîyayîşanê şarî bîyî. Ma nê kombîyayîşan de teyna prosesê weçînayîşan û netîceyan ser ney polîtîkayanê partîye ser o zî ercnayîşan kenê. Şarê ma rexneyanê zaf cidîyan keno. Şar wazeno ke netîceyanê nê ercnayîşan de bireso cayêkî. Xora şar zî nêpaweno ke nişka ra her çi çareser bibo.”
Bulute pare kerd ke prosesê kombîyayîşanê şarî ra dima ê do prosesê konferans û kongreyan rê dewam bikerê û vat: ”Kombîyayîşê şarî hê qedîyenê. Ney ra dima xora şar ma ra yew hemle paweno. Ma do mîyanê di hewteyanê destpêkan ê tebaxe de di komxebatan bikerê. Dima konferansê ma do dest pêbikerê. Pêşnîyazê ke kombîyayîşan de ameyê kerdene do hetê delegeyan ra bêrê nîqaşkerdene û birî bêrê dayene.”
Bulute dîyar kerd ke kombîyayîşan de şar tewr zaf weçînayîşanê herêmîyan meraq keno û vat: ”Şar meraq keno ke rayîr û metodê ma yê weçînayîşan do senî bibê. Ma do senî namzetanê xo eşkera bikerê. Ma 2019 de wextê weçînayîşanê herêmîyan de karê fîzîbîlîteyî kerdbî. Xeylêk qeza, tax yan zî dezgehan de ma kombîyayîşî kerdbî û nînan ser o namzetî vetbî. Ganî ma reyna bi nê metodî têbigêrê.
Hetê bînî ra ma do kongre de nameyê Partîya Çep a Keske bivurnê. HDP û bi nameyê xo yê neweyî Partîya Çep a Keske pîya do têbigêrê. Xora ma do HDPyî nêqefilnê la tewirnameyê partîya ma ya newîye do heman bibê. Ma dî ke weçînayîşanê gulane de sereyê şarê ma tay têmîyan bi. Kurdîstan de çekuya çepî zî sereyê merdiman têmîyan kerdo. Naye ra zî ma tay wekîlîyî destî ra dayî. Şar wazeno ke yew partî û yew nameyî bivîno.”
