Meclîsê Partîye yê Partîya Demokratîke ya Şaran (HDP) netîcenameyê kombîyayîşê 16ê tebaxe pare kerd.
Netîcename wina yo:
Şer û îşxalê AKP-MHPyî
”Îqtîdar bi polîtîkayanê şer, îşxal û talanî xîret keno ke payan ser o vindero. Bi Planê Çinkerdişî yo ke Qesra Dolmabahçe de amade bîyo îqtîdarî reyna şer da destpêkerdene û cografyaya Kurdîstanî kerde talan. Îqtîdar wetê sînorî de zî operasyonan keno, huqûqê mîyanneteweyî binpay keno. Îqtîdar bi medaxelayanê Dengizê Sipî û Ege şeranê bînan geş keno, daxîlê şerê Azerbeycan-Armenîstanî beno, cerganê xo Sûrîye ra beno Lîbya.
Meseleya kurdan
Seba çareserîya meseleya kurdan hewceyê çareserîya demokratîke zaf o. Kurdî hetê cografîk, sîyasî û stratejîkî ra merkezê Rojhelatê Mîyanênî de yê. Çareserîya meseleya kurdan a ke hetê rejîmanê Rojhelatê Mîyanênî ra ci rê teda yena kerdene, seba cuyêka demokratîke zemînêk o. No zemîn têna bi wedaritişê tecrîdê vera Ocalanî û haştîye mumkîn beno.
Tecrîd
Sîstemê Îmraliyî ewro seba pêro şaran vurîya sîstemêkê rejîmê faşîzmî. Îqtîdar hêdî hêdî pêro komel visneno binê tecrîdî. Eşkerayîya Komîteya Vernîgirewtişê Muameleyo Xirab û Îşkenceyî ya Ewropa (CPT) zî sîstemê tecrîd û îşkenceyî yê Îmraliyî kifş kerd. Wedaritişê tecrîdî, ewro mesuldarîyêka şorişgêre ya. Ma sey HDPyî amade yê ke seba çareserîya meseleya kurdî rîsk û mesuldarî bigêrê xo ser. Ma venga roşnvîr, aktor, akademîsyenan û rayaumûmîye danê ke seba çareserîya meseleya kurdan înîsîyatîf bigêrê.
Xizanîye
Krîzo ekonomîk ê Tirkîya prosesê janî de zêdîya. La AKPyî bi rojdemanê zûrayînan xizanîya şarî nimnena. Her ke şino qesre, terefgîrê ci û sermaye benê zengîn la se ra 99ê şarî xizan o. Çareserîya naye çinkerdişê îqtîdarî yo. Ma pê bawer ê ke do ekonomîya şarî awan bikerê.
Peymana Stenbolî
Peymana Stenbolî xeta ma ya mor a. HDP partîyêka cinîyan a. Ma tim terefgîrê têkoşînê cinîyan ê. Gamê şîdetî yê îqtîdarî do rastê têkoşînê ma û cinîyan bêrê. Ma bi pêro îradeyê xo hetê Peymana Stenbolî de yê. Ma îqtîdar hîşyar kenê ke xo Peymana Stenbolî ra weta bigêro. Heman wextî de HDP do tim vera hîşmendîya serdestîya camêrdan têkoşîn bikero.
Jan
Şarê Tirkîya têna binê tehlukeyê vîrusî de nê binê tehlukeyê peygoşîya îqtîdarî de yê zî. AKP nêeşka heqê tesîranê ekonomîk, weşî û komelkîyanê janî ra bêro û coka binê nameyê ‘normalîzebîyayîşî’ de menfaatê sermaye pawitî. AKPyî weşîya şarî viste binê tehlukeyî. Ma venga komelî danê ke tedbîranê xo bigêrê û bi awankerdişê torranê paştdayîşî weşîya xo bipawê.
Qeyûm
Polîtîkaya qeyûmî pêro Tirkîya de vila bîye. Bi na polîtîkaya rejîmê qesre heqê hemwelatîya kurdan wedarîyayî. Îqtîdarî îradeyê şarê ma xesp kerd la ewro skandalanê qeyûmanê xo reyde têrî ame. Îqtîdar nika zî qeyûman rê qeyûm tayîn keno. HDP her raya şarî teqîb keno û mesuldarîya îradeyê şarî xo milî de çarneno. Ma do qet qeyûmanê xespkeran û ê bînan nêşinasnê û hesabê sûcanê înan verê huqûqî de bipersê.
‘Vera şerî haştîye, vera tecrîdî azadîye’
Ma do 1ê êlule de Rayraşîyayîşê Demokrasî û Kombîyayîşê Demokrasî bi şîarê ‘Vera şerî haştîye, vera tecrîdî azadîye’ bikerê yew. Nika wextê ci yo ke haştîye û têkoşînê cuya têdûşte do bibê komelkî. Nika wextê ci yo ke Rojhelatê Mîyanênî û Tirkîya bi meşaleya haştîye roşnî bibê. Ma do na çarçewe de kuçe bi kuçe, şaristan bi şaristan, taxe bi taxe zîncîrê haştîye reyde meşaleya roşnîye bigêrê destê xo. Ma venga pêro şaranê Tirkîya danê ke ma pîya nînan berz bikerê.” ANQARA
