HDP’ê têkildarî zarokên xwişk û birayên hev Ayaz û Nupelda Guloglu yên li Pilûra Dêrsimê di encama teqîna mayînê de jiyana xwe ji dest dan daxuyanî da
Partiya Demokratîk a Gelan (HDP) têkildarî kuştina xwişk û birayên hev Ayaz û Nupelda Guloglu yên li Navçeya Pilûrê ya Dêrsimê di encama teqîna mayînê de jiyana xwe ji dest dan, daxuyaniyek nivîskî da. Li ser navê HDP’ê daxuyanî ji aliye cîgirê hevserokan ê Berpirsiyarê Rêxistinê Alîcan Onlu ve hat dayîn.
Onlu diyar kir ku Ayaz û Nupelda Guloglu dema li tenişta xanî dilîstin teqemenî bi wan de teqîya ye û jiyana xwe ji dest dane û anî ziman ku bê şert û merc tişta bûye sedema kuştina zarokan şermezar dike û xwest kesên berpirsiyar bi lez bên cezakirin.
Onlu da zanîn ku li Dêrsimê 10 hezar mayîn hatine çandin û tenê di sala 2009’an de li gorî rapora Şopandina Bombeyên Çandî 23 zarok bi teqemeniyan jiyana xwe ji dest dane û wiha got: “Waliyê Dêrsimê bêyî der barê bûyerê de lêpirsînê bide destpêkirin û lêkolîna tiba edlî pêş bixe, ji bo bersûc neyên cezakirin daxuyanî daye. Walî wekî cînayeta Sakine Oguz a di meha gulanê de li navçeya Xozatê daxuyanî da, niha ji bo van zarokan jî heman daxuyanî da. Bi vê yekê dixwaze ser lêpirsînê bigire û bersûc bê ceza bên hiştin. Em dîsa sersaxî ji bo hemû malbat û gelê Dêrsimê re dixwazin.” ENQERE
