Heyeteke ku ji namzetên hevşaredariyê yên HDP’ê pêk dihat li Pirsûsê dikana malbata Şenyaşar û esnafên navçeyê ziyaret kir. Di serdanê de esnafan got ku wan zilma li dijî malbata Şenyaşar ji bîr nekiriye û dê Pirsûs bersiva vê bide
Namzetên hevşaredariyê yên Şaredariya Pirsûs a Rihayê yên Partiya Demokratîk a Gelan (HDP) Hatîce Çevîk û Abdullah Polat, parlamenterê HDP’ê yê Rihayê Omer Ocalan û rêveberên HDP’ê welatî û esnafên Pirsûsê ziyaret kirin. Esnaf û welatiyan namzetên HDP’ê bi kêfxweşî pêşwazîkirin û desteka xwe diyar kirin.
Şandeya HDP’ê çû serdana dikana malbata Şenyaşar ku di hilbijartina 24’ê hezîranê de 3 ferdên wan ji aliyê AKP’iyan ve hatibûn qetilkirin. Di serdanê de esnafan diyar kir ku wan qetilkirina malbata Şenyaşar ji bîr nekirine û wek her hilbijartinê dê di vê hilbijartinê de jî li Pirsûsê winda nekin. Di serdanê de esnafekî got ku cîranên wan li ber çavên wan kuştin û ew dê li dijî vê zilmê bêdeng nemînin.
‘Em malbata Şenyaşar ji bîr nakin’
Esnafan ji şandeyê re destnîşan kir ku dê dîwarên beton ên li dora şaredariyê rakin û dirûşma Şaredarî Ya Me Ye berz kirin. Şandeya HDP’iyan piştre jî çû serdana dikana malbata Şenyaşar. Di serdanê de parlamenter Omer Ocalan wiha got: “Cînayeta ku li vê dikanê hatiye kirin, di esasê xwe de mînaka zilmê ya herî şênber a li ser gelê kurd e. Em ê vê kolanê û malbata Şenyaşar ji bîr nekin. Hevşaredar Hatîce Çevîk jî hevalek ji we ye. Guh bidin çîroka wê.”
Xebatên li Siwêregê
Namzetê hevşaredariyê yê Şaredariya Siwêregê yê HDP’ê Turan Tuysuz û rêveberên HDP’ê jî li herêmên Karakeçî û Karahanê serdana welatiyan û rûspiyên gundên Gogerçîn, Hamamveran, Kela, Xelef, Keçîkuyu, Xerabreş, Dalpek û Mirxasê ziyaret kirin. Namzeta hevşaredariyê ya Şaredariya Siweregê Emîne Çetîner jî li navenda navçeyê bi hilbijêran re hate gel hev. Çetîner derî bi derî geriya û piştgirî ji hilbijêran xwest. Piştî serdana li taxan jî çû serdana nûnerên saziyên civakî. RIHA
