Yewîya Hêzî ya Şorişgêre ya Dêrsimî qezaya Qisle de buroyê weçînayîşî akerd. Parlamenterê HDPyî, namzedê şaredarîyan, temsîlkarê sazîyan, hunermende Pinar Aydinlare û Grup Îsyan Ateşî beşdarê programê akerdişî bîyî
Parlamenterê HDPyî Alîcan Onlû, Kemal Bulbul, endamê MP yê HDPyî, temsîlakrê ESP, EMEP û Partîzanî beşdarê programî bîyî û Pinar Aydinlare û Grup Îsyan Ateşî bi kilamanê xo program kerd şên. Namzedanê hemserekîya Şaredarîya Qisle program de qisey kerd û waşt ke şar paştdarîye bido înan.
Namzedan wina va: “Ma hêz û bawerîya xo mucadele û tarîxê xo ra gênê. Wazenê ke bajarê xo pîya îdare bikê û qeraran bi şarê xo bigîrê.”
Parlamenterê HDPyî Kemal Bulbulî zî wina va: “Ma HDP tena şarê Kurdî û Elewîyan nê, Mustafa Suphîyî ra bigê heta Denîz Gezmîşî, Mahîr Çayanî ra bigê heta Îbrahîm Kaypakkayayî temsîl kenê. Ma Seyît Riza yo ke Meydanê Genimî yê Xarpêtî de vato “ Mi dek û dolavanê şîma de baş nêkerd no mi rê bî derd, ez zî şima ver de nêna çok û no zî şima rê bibo derd” temsîl kenê. Ma wayîrê mîras û kulturê winasîyî yê.” DÊRSIM
