Partîya Têdûştîye û Demokrasîyî ya Şaran (HEDEP) Meclîs de derheqê tecrîdê vera Rayberê Şarê Kurdî Abdullah Ocalanî de eşkerayîya çapemenîye daye. Wekîlê HEDEPî eşkerayîye de amade bîyî.
Serekwekîla Grûba HEDEPî Saruhan Oluçî vist vîrî ke Rayberê Şarê Kurdî ra xeberêke nêna gireewtene û vat: ”Na rewşe kerdişê vera merdimatîye yo û huqûqê zereyî û mîyanneteweyîyî de cayê na rewşe çin o.”
Hemvervatoxê HDKyî û Wekîlê HEDEPî yê Îstanbulî Cengîz Çîçekî kerdişê Îmraliyî sey ”îlegalîya tewr pîle” pênase kerdo û vat: ”Tecrîdê Îmraliyî skandalê huqûqî yo. Na mesele meseleya rûmetî ya pêro Meclîsî ya. Na bêhuqûqîye teyna vera Birêz Ocalanî nêna kerdene. Gultane Kişanak, Can Atalay pêro bi hawayêkê bêhuqûqî tepişîyenê. Meseleya tewr pîle ya Tirkîya meseleya kurdan a. Heta ke meseleya kurdan çareser nêba bêhuqûqîyî do nêqedê. Nêzdîbîyayîşê bi Birêz Ocalanî nêzdîbîyayîşê bi meseleya kurdan o.
25ê adara 2021î ra nata Birêz Ocalanî ra xeberêke nêna girewtene. Seba ke meseleya kurdan bi rayîrê demokratîkî bêra çareserkerdene ganî tecrîdê Îmraliyî bêro wedaritene. Êyê ke xo rê vanê demokrat û merdim ganî vera nê tecrîdî vejîyê.
Ma venga dewlete û îdarekaranê ci danê ke wa goreyê qanûnanê xo têbigêrê. Wa birêz Ocalan bieşko pêro heqanê xo bişuxilno. Ma do seba ke Birêz Ocalanî bivînê ewro saete 16.00 de muracatê Wezîrîya Edaletî bikerê. Ma do erkê xo bîyarê ca.” ANQARA
