Navenda Nûçeyan |
Vîrûsa Koronayê ku demek berê li bajarê Vuhan ê Çînê ji ewil lê rast hatibû, roj bi roj belavtir dibe. Hejmara kesên ji ber vîrûsê jiyana xwe ji dest didin jî zêdetir dibe. Têkildarî mijarê Rêxistina Tenduristiyê ya Cîhanê (WHO) daxuyaniyek da û destnîşan kir ku ji destpêka derketina vê vîrûsê heta niha hejmara kesên ji ber vê vîrûsê jiyana xwe ji dest dane derket 259 kesan.
Rêxistinê destnîşan kir ku heta niha li Çînê di 10 hezar kesan de rastî vê vîrûsê hatine û li temamiya cîhanê jî ev hejmar derketiye 11 hezaran. Rêxistinê da zanîn ku vîrûsa koronayê heta niha li 27 welatan belav bûye.
Di heman demê Komîsyona Tenduristiyê ya Neteweyî (NHC) têkildarî mijarê daxuyaniyek da û da zanîn ku li Çînê hezar û 795 kes jê rewşa wan cidî, vîrusê bandor li 11 hezar û 791 kesan kiriye. Her wiha 118 hezar û 478 kes jî di bin muşahadeyê de ne û 243 kes jî hatine dermankirin.
NHC’ê daxuyand ku di 24 saetên dawîn de 46 kesan ji ber vê vîrûsê jiyana xwe ji dest dane. Her wiha li gorî agahiyên NHC’ê, vîrûsa koronayê li welatên weke Tayland, Japonya, Sîngapûr, Koreya Bakur, Awûstralya, Malezya, Almanya, Fransa, DYA, Vîetnam, Emîrtiya Ereban a Yekgirtî, Kanada, Ingilistan, Rûsya, Nepal, Hindistan û Swêdê jî belav bûye.
