Navenda Nûçeyan |
Hejmara sibatê ya rojnameya mehane Newaya Jin bi manşeta ‘Berxwedana ku veguherî çandê, komploger têk bir’ derket.
Rêberê Gelê Kurd Abdullah Ocalan ku piştî 8 salan bi parêzerên xwe re hevdîtin kir, li ser siyaseta demokratîk û jiyana civakî peyamên girîng da. Nivîskar û aktîvîst Gonul Kaya vê mijarê şîrove kir.
Jînda Denîz jî di nivîsa xwe de destnîşan kir ku hegemonya navendî ji dîrokê heta niha kurd xistiye nava çembera man û nemanê û ragihand ku kurdan di dîrokê de berxwedaneke mezin nîşan dan û niha pêwîstiya xwe bi helwesteke neteweyî ya hevpar heye.
Endama Komîteya Jineolojiyê Zozan Sîma pênaseya guhertina demografîk kiriye û wiha got: “Çîrokên li kampên penaberan, cenazeyên li peravan xistin, jiyana li xerîbiyê navê xwe di civaknasiyê de guhertina demografîk e.”
Sîma di nivîsa xwe de bal kişandiye ser polîtîkayên qirkirinê û ragihandiye ku dewleta tirk a ku netewetiya tirk li ser ‘tunekirina kurdan’ ava kir, pêvajoyeke nû ya komkujiyê xistiye dewrê.
Dîrok Qehreman jî heman mijar li rûpelên kurdî şîrove kir û destnîşan kir ku qirkirina demografîk rêbaza herî bi rîsk û metirsîdar e.
Yildiz Çakar jî girîngiya zimanê dayikê nirxandiye û destnîşan kiriye ku ziman hiş e, jinên kurd tevî bi dehan şer, sirgûn û mirinê ya hezaran salan çand û zimanê xwe gihandiye zarokên xwe.
Di rûpela portre de jî çîroka jiyana Mîna Qazî hatiye vegotin ku di têkoşîna serxwebûnê ya Kurdistanê de rola xwe girîng e û di 28’ê Sibata 1998’an de jiyana xwe ji dest da.
Di kategoriya hunerê de jî Nazan Ustundag fîlm û rêzefîlmên ‘têkildarî jinê’ nirxandiye.
Di rûpela civak-jiyanê de Eyleme Xelîkan nivîseke bîranînê li ser 6 gerîlayên jin ên li Herêmên Parastinê yên Medyayê di 20’ê Sibata 2003’yan de ji ber aşûtê jiyana xwe ji dest dan, nivîsandiye.
Ji nivîskarên rojnameyê Zerya Gul bi navê ‘Hînbûn mirovan lîberal dike’ û Gulistan Çiya Îke jî bi navê ‘Çerxa Îmraliyê’ gotar nivîsîne.
