Tevgera Jinên Azad (TJA) di çarçoveya kampanyaya ‘Em xwe diparêzin’ de li Parqa Ûgûr Mûmcû ya Guzel Tepe ya li navçeya Çîglî ya Îzmîrê, bi jinan re hat gel hev. Hevseroka Kongreya Civaka Demokratîk (KCD) Leyla Guven, Hevseroka HDP’ê ya Îzmîrê Besriye Tekgor û gelek jin tev li çalakiyê bûn.
Leyla Guven diyar kir ku yek ji armancên kampanyaya TJA’yê derxistina holê ya komkujiyên li hemberî jinan e û wiha got: “Wê TJA li hemberî komkujiyên jinan serî netewîne. Em ne namûsa kesî ne. Namûsa me welatê me û azadiya me ye. Divê em ji bo vê têbikoşin. Wê jin biqîrin dinyayê. Em ê serî ji tundiya we zilaman re netewînin û xweparastina xwe bi pêş bixin. Em ê jiyaneke bêxweparastin qebûl nekin. Ji bo vê yekê pêwistî bi rêxistinbûneke baş heye. Dema ku Sakîna Cansiz li zindana Amedê tifê ser çavê Esat Oktay kir ev dîrok derket holê. Arîn Mîrkan ji bo Girê Miştenûrê nekeve laşê xwe kir bombe û bi ser DAIŞ’ê ve meşiya. Çareserî li wir hat afirandin. Jin tu carî bê çare nemaye.”
Jin serî netewandin
Her wiha Guven da zanîn ku jinên kurd gelek êş kişandine û wiha axaftina xwe bi dawî kir: “Dewletê heta astekê zilaman tirsandiye lê bi jinan serî netewandiye. Lewre jin Gulten Kişanak e ku bi kûçikê Esat Oktay re 6 meh di heman hucreyê de ma. Jin Sebahat Tuncel e ku tu carî serê xwe ji zilmê re natewîne. Ji ber vê yekê herkese ku dixwaze derkeve derve bixînin. Lewre dizanin heke jin şiyar bibe dê civak şiyar bibe. Jina kurd şiyar bûye û ji hêla van ve tiştekî ku bê kirin nemaye.” ÎZMÎR
