Aktîvîst û rojnameger Hêmin Mamend 24ê adara 2020î de sereştişê vera keyeyê xo hetê hêzanê Asayîşê Hewlêrî yê PDKyî ra amebi destbendkerdene û rixmê tedayan zî o heta 7ê nîsana 2020î zîndan de mendbi. Mamendî derheqê îqtîdarê PDKyî û îdareyê Hewlêrî de ANFyî rê qisey kerd.
Mamendî pare kerd ke tedayanê PDK û hêrişanê dewleta tirke ra ey Hewlêr teriknayo bar kerdo Silêmanî. Mamendî vat: ”Ez çend reyî hetê hêzanê PDKyî ra ameya tepiştene û tehdîtkerdene. 2017 û 2019 de zî ez ameya destbendkerdene. 2020 de ez di mangan zîndanê PDKyî de menda. Gerreyanê Mesrûr Barzanîyî ra derheqê mi de 12 dosyayî est ê, her dîyanê înan ra mi çar serrî cezaya zîndanî girewte. 2020 de dima ke zîndanî ra vejîyaya mi roportajêk da û vat ke ez do verê teda û gefan de sereyê xo nêara war. 25 saetan ra dima hêzanê PDKyî û keyeyê Barzanîyan hêrişê keyeyê mi kerd. Sereştiş de dadîya mi rê zî îşkence ame kerdene. Ez nêeşkena abigêra Hewlêrî. Xora dewleta tirke Hewlêr û Behdînanî sey erdê xo vînena.
Keyeyê Barzanîyan yew dîktatorî ya. Ê teyna fermananê dişmenî anê ca. Derheqê keyeyanê Barzanîyan de mehkemeyanê Amerîka rê 25 gerreyî ameyî kerdene. Nê gerreyan ra keyeyê Barzanîyan qerqilîyeno. Ê zanenê ke sibayêko tarî pabeyê înan o. Ê do hinî nêeşkê vengê azadîye bibirnê. Mesrûr Barzanî yew terorîst o. Mesrûr Barzanî xizmetê şarê ma ney xizmetê îşxalkeran keno. O kişîyayîşê embazê mi Serdeşt Osmanî ra mesuldar o. Ma zanayêne ke eke Mesrûr Barzanî bêro îqtîdarî heqê ma do bikêmîyê. Wina bi. Hewlêr û Behdînan seba rojnamegeran cayê asayî nîyê. Embazê ma zîndanan de bi rûmet û sereberzî xo ver danê. Peynîya peyêne de azadîye do ser bikewa.” SILÊMANÎ
