Fermandaranê Qerargehê Merkezî yê YJA-Starî Şerda Mazlûm Gabar bi wesîleya serrgêra 39. ya Roşanê Gandarbîyayîşî yê 15ê Tebaxe ANFyî rê ercnayîşî kerdî.
Ercnayîşê Fermandare Gabare bi nê hawayî yê:
”Çalakîya 15ê Tebaxa 1984î ya ke Dih de amebî kerdene wayîra yew ruh û xete bîye. Hemleya 15ê Tebaxe reyde destpêkê çalakîyanê çekdaran nêbîye. Hemleya 15ê Tebaxe netîceya qirkerdiş, teda, dej û hêrişanê vera kurdan bîye. Seba xelisnayîşê şarê kurdî bire dîyabî ke şerê gerîlayan dest pêbikero.
Serranê 80an de sey Kuba, Spanya zaf cayan de şerê gerîlayan ameyêne kerdene. O çax mîyanê rêxistinanê çepanê Tirkîya de zî şerê gerîlayan ser o nîqaşî est bîyê. Têgêrayîşê ma gama xoverdayîşî ya verêne şaristanan de eşte. Dima zî 1984 de şerê gerîlayan da destpêkerdene. PKKyî vat ke ‘Kurdîstan kolonyal o’ û vera kolonyalîzm, înkar, qirkerdiş û polîtîkayanê faşîstan têkoşîn da destpêkerdene. ARGK sebebê şîdet û şerî ney netîceya nînan bi.
Şerê ma yê gerîlayan ê 40 serran de stratejîya ma ya esase Şerê Şarî yo Şorişgêr bîye. Dima serranê 90an de pêşnîyazanê Rayberîye ser o ma stratejîyanê xo de tay vurîyayîşî kerdî. Sosyalîsmê reelî de israr goreyê ê çaxî nêbî. Têkoşînê PKKyî de şerê nasnameyî esas bi. PKKyî hetêkî ra şerê seba cinîyan, xoza, kultur û sîyasetî zî kerdêne. PKKyî vera hişmendîya feodale şerêko pîl kerd. Coka şerê ma yê gerîlayan zerrîya şarê ma de bi wayîrê cayêkê girîngî.
PKKyî nê têkoşînan de bi hezaran şehîdî dayî. Hetê bînî ra şerê gerîlayan ê PKKyî têgêrayîşanê bînan rê zî bi nimûne û çimeyê îlhamî. Bi taybetî serkewtişê gerîlayan ê vera Gladioyê NATOyî û DAIŞî pêro dinya de eleqeyêko pîl dî. Şaranê dinya bi nê hawayî gerîlayê azadîye yê Kurdîstanî û cinîyê kurdî şinasnayî. Ewro xoverdayîşê xopawitişî yê hêzanê Kurdîstanî pêro dinya rê çimeyê îrade, cesaret û hêvî yê.
Hêzê ma yê HPG û YJA-Starî teyna hêzê şerî nîyê. Ê hêzê winayên ê ke têkilîyanê sinifan-neteweperwerîye, cinî û camêrdan pers kenê û azadîya nasnameyan kenê. Xora PKKyî ronayîşê xo ra nata azadîya cinîyan kerdbî esas û xo rê vatbi partîya cinîyan. Têgêrayîşê ma şerê azadîye, artêşbîyayîş, xopawitiş, xorêxistinkerdiş û fermandarbîyayîş musnayî cinîyan.
Garantîya têkoşînê gerîlayan na ya ke cinî û şarî pîya sey hêzê serkewtişî tede îradeyê xo rê sîstemêkî awan kenê. Têkoşînê ma yê gerîlayan bingeyê Jineolojî de keno ke erjanê femînenan pêro komelî rê vila bikero. Gerîlayî jineolojî kenê esas, goreyê krîteranê ekolojî têgêrenê. Gerîlayanê azadîye yê Kurdîstanî bi fikrê Jineolojî û metodanê kuantomîkan, fikrê gerîlayan de rîpelêko newe aferna û xeta Egîd û Zîlane de tarîxê azadîye nuşt.
Hemleya 15ê Tebaxe hem seba nasnameyê kurdanê azadan mîladêk o hem zî seba nasnameyê cinîya azade rojbîyayîş o. Ewro gerîlayî rayraşîyayîşê xo yê bêhempayî rê dewam kenê. Ewro bi hezaran embazê ma binê fermandarîya embaz Egîdî de şer kenê û Zap de ruhê 15ê Tebaxe û terzê embaz Egîdî visnenê leweyî. Gerîlayê ma benê tersê dişmenî. Na serra 39. ya Hemleya 15ê Tebaxe de gerîlayan Zap dişmenî rê kerdo cehenem û rayîr nêdano ci.
2023 de her cayê Kurdîstanî de ruhê Hemleya 15ê Tebaxe bi îfadeyê ruhê serkewtişî. Dêrsimî ra heta Botanî, Serhedî ra heta Garzanî, Amedî ra heta Zapî no ruho ke nêno binvistene vila beno. Ewro artêşa gerîlayan bi tecrubeyanê 40 serran, bi perwerîya şehîdan, paradîgmaya neteweya demokratîke û modernîteya demokratîke şer kena. Mumkîn nîyo ke çew verê na artêşe bigêro. Serkewtiş do bibo ê gerîlayan ke xeta Şehîd Egîdî de şer kenê.” BEHDÎNAN
