Fermandar Sari Îbrahîmo ke Êlih de mîyanê keyeyêkê feqîrî û kedkarî de ame dinya, emrê ciwanîye de serkêşanê Têgêrayîşê Azadîya Kurdan ra Egîd (Mahsûm Korkmaz) nas kerd û bi nê hawayî raywanîya ê dest pêkerde
Kadroyanê serêkşan ê PKKyî ra Ramazan Toptaş (Sari Îbrahîm) 1ê Tebaxa 2006î de bi komployêk şehîd bi. Serê şehadetê ê ra 13 serrî ravêrtî. Sari Îbrahîmo ke nameyê xo rîpelanê tewr ercayeyan ê tarîxî de nuşt, mîyanê Kurdan de gerîlayêko efsanewî bi. Wextê grûba ewilêne ya PKKyî de mucadele nas kerd û serra 1978 de tewrê refanê mucadeleyî bi. Mahsûm Korkmazî (Egîd) dir Botan de mîyanê yewîya ewilêne ya şerî de bi.
Emrê ciwanî de bala fermandar Sari Îbrahîmî şina serê mucadeleyê şorişgêrî. Êliho ke tede xeylî fraksîyonî estbî, petrol newe amebi dîyene, karkerê petrolî û organîzebîyayîşê sendîkayan ameyên rojdem. Pîya bi embazê xo yê domanîye Mahsûm Korkmaz û Gûrbet Aydine bi qehremanîya xo bajar de veng dayêne. Serranê 1970an de kadroyanê serkêşan ê PKKyî ra Mazlûm Dogan nas kerd û tewrê kadroyanê serkêşan ê Têgêrayîşê Azadîya Kurdan bi. Hemverê kompradoranê ajanan û hêzanê feodalan pîya bi Mazlûm Dogan û fermandar Egîdî hemverê zulmî de xover da, zextî qebul nêkerdî. Dewleta ke hemverê averşîyayîş û xurtbîyayîşê PKKyî matmayî mende bi derbeya leşkerî ya serra 1980î kerd ke PKKyî çin kero.
Fermandaranê destpêkî ra yew bi
A game yanî serra 1980 de fermandar Îbrahîm ravêrt wareyê Lubnanî ke Ocalan tede bi. Dimayo ke wextêk Ocalanî dir mend ravêrt Başûrê Kurdistanî û tewrê yewîya ke amadekarîya Hemleya 15ê Tebaxe kerdêne bi. A game Botan de xeylî xebate kerde û amadekarîyî kerdî.Endamê Komîteya Rayberdişî ya PKKyî Dûran Kalkanî qalê ê kerd: “Payîza serra 1982yî de embaz Îbrahîm mîyanê grûba agêrayîşê welatî de bi. Tewrê rayraşîyayîşê azadîye bi. Bi hawayêkê aktîfî tewrê prosesê amadekarîya Hemleya 15ê Tebaxe bi û karê bicabîyayîşê Botan, Zagros û Behdînanî de rolê ê zaf bi. Rixmo ke emrê ê ciwan bi, hewna qijbi xebatê tewr zafî embaz Îbrahîmî kerdêne. Jêhatîbîyayîşê ê, afernayoxîya ê her tim kerd ke merdim ê rê bigêro û ê dir bixebetîyo.”
Kalkanî ard ziwan ke dimayê Hemleya 15ê Tebaxe seba mendekerdişê na hemleye pîya bi fermandar Egidî Botan de wezîfeyê zaf muhîmî bica ardî û vat seba mîyanê şertanê tewr giranan de, mîyanê şerî de more xo da xeylî serkewtişanê tarîxîyan ro mîyanê embazanê xo de sey ‘Zehmetkêş’ ameyêne naskerdene. Kalkanî ard ziwan ke rolê fermandar Sari Îbrahîmî vilabîyayîşê gerîlayan ê herêmanê Botan, Amed, Dêrsim, Başûrrojawan, Amanos, Deryaya Sîya, Koçgirî, Deryaya Spî, GAP û herêma Serhedî de pîl bi û dereceya mesuldarî û fermandarîye de gureyî bica ardêne.
Suxteyo pêgirewte yê Ocalanî bi
Fermandar Sari Îbrahîmo ke her firsend de şîyêne verê Rayberê Şarê Kurdî Ocalanî û bi hawayêkê sîstematîkî tewrê perwerdeyan bîyêne, bi hawayêkê hîna xurtî agêrayêne wareyanê mucadeleyî. Gama ke Ocalanî dir bi ê nizd ra şopna, bi pêgirewteyîyêka pîle kerd ke rayîr û metodanê ê pratîk de bica bîyaro. Fermandar Sari Îbrahîm bi durustî, kedkarî, afernayoxî û pêgirewteyîya xo hetê şar, rayberî, partî, mucadele û hemrayanê xo ra ameyêne naskerdene. Mîyanê Têgêrayîşê Azadîye yê Kurdî de mîlîtananê nimûneyan ê tarîxê gerîlayan ra bi.Serrgêra 13ine ya şehadetê ê de her herêmanê gerîlayan de hetê gerîla û fermandaranê gerîlayan ra yeno bivîrardene.
Çime: Ajansê Xeberan yê Firatî
