Hemşaredara HDPyî ya Qereyazî Melîke Goksu derheqê deynê ke qayûm şaredarî rê vera dayo de qisey kerde. Goksuye dîyar kerde ke qayûm şaredarî 2 mîlyon û 591 hezar tl kerdo binê deyn.
Hemşaredarê Partîya Demokratîke ya Şaran (HDP) yê qezaya Qereyazî yê Erziromî Melîke Goksu û Burhanettîn Şahînî weçînayîşê herêmî yê 31ê Adare de 61,83ê rayan girewtî û bîyî şaredar. Hemşaredaran bale antî prosesê qayûmî ser û dîyar kerdî ke qayûm şaredarî rê 2 mîlyon û 591 hezar tl deyn vera dayo. Derheqê babete de Hemşaredara HDPyî ya Qereyazî Melîke Goksuye qisey kerde.
Goksuye destpêkê qiseykerdişê xo de arde ziwan ke prosesê weçînayîşî de xeylê zor û zehmetî ameyî cuyayene û wina va: “La vera heme zehmetîyan de xebatê weş ameyî kerdene. Prosesê xebatanê weçînayîşî de şar reaksîyon ramojnayêne qayûmî. Şaerdarîyê ke bi hawayo antî demokratîke ameybî xespkerdene hetê şarî ra tepîya ameyî girewtene. Şar wexto ke şîyêne sindoqan ser xeyl bi kelecan bî û vera tehditan de çong nêrona. Şarê ma reyna camêrîya xo nîşan da.”
‘Prosesê herînayîşê mazbata ame dergkerdene’
Goksuye dewamê qiseykerdişê xo de bale ante astengîyê vera herînayîşê mazbatayan ser û domnaye: “Ma 10ê nîsane de mazbataya xo herîna. Seba ke îtirazê netîceyê weçînayîşî ameyî kerdene, demê herînayîşê mazbataya ma derg bî. Îtirazê ke Heyetê Weçînayîşî yê Berzî (YSK) rê ameyî kerdene, qebûl nêbîyî. Wexto ke ma seba herînayîşê mazbataya xo şîyî zî ame vatene ke do AKP reyna îtiraz bikero û cok ra badê 3 rojan mazbata dîya ma. Na rewşe nîşaneya bêhuqûqî ya. Seba ke ferqê rayanê ma û yê AKPyî zêde bî, umidê xo herînayîşê şaredarî ra birnayî. Dima ra mazbata dayî ma.”
‘Şaredarî ameya talankerdene’
Goksuye tewr peynî wina va: “Badê ke ma mazbata herîna, ma tewrê şarî heta şaredarî rayîr şîyî. Verê ke ma bikewî şaredarî, ma barîkatanê vernîya şaredarî raşte ra wedarna û dima ra ma kewtî şaredarî. Wexto ke ma şaredarî dewr girewte, ma vîna ke qayûm sey şaredarîyanê bînan ke qayûm tayînê înan zî ameybî kerdene talankerî kerdo. qayûm xo dima tena deyn vera dayo. Xizmetê qayûmî 2 mîlyon û 591 hezar tl deyn o.” ERZIROM
