2ê temmuza 1993î de bajarê Sêwasî de wextê Şahîyê Pîr Sultan Abdalî Otelê Madimakî de 33 nuştox, hozan û rayîrberî bi saxî ameyî veşênayene û kiştene. Hemserekê Komeleya Elewêyê Demokratîke (DAD) Musa Kulu seba qetlîyamî va ‘Roja Sîya’ û ard vîrî ke tarîxê komarî de merdimî bi saxî ameyî veşênayene û qetlîyam hema zî dewam keno.
Kulu qiseykerdişê xo de dîyar kerd ke serranê 1990î de merdimî dest bi waştişê heqanê xo kerdî û nê çîyî bi refleksê dewlete vejîyayî werte û wina dewam kerd: “Cografyaya kurdan de demo ke Qirkerdişê Sêwasî pê ame 17 hezar cînayetê kerdoxê înan nedîyar zî pê ameyî û nizdîyê 5 hezar dewî ameyî veşênayene. Roşnvîr, sîyasetmedar, avukat û nuştoxî bi suqîqast ameyî kiştene. Ê tewr dejin zî Sêwas de bi saxî veşênayîşê merdiman o ke ê kesî bi vengê xo, bi deyranê xo, bi şîîranê xo û edebîyatê xo bibî vengê merdiman. Çîyo ke ame kerdene belkî zî qirkerdişê tewr gird ê tarîx yo.”
Kerdoxê Qirkerdişê Sêwasî nêameyî muhakemekerdene
Kulu dewamê qalîkerdişê xo de ard ziwan ke kerdoxê qirkerdişî hema zî nêameyî muhakemekerdene û wina va: “Kerdoxan rê ceza nêame birnayene. Kesê ke înan rê ceza ame birnayene zî remayî şîyî teberê welatî. Kerdoxan ra Ahmet Turan Kiliç hetê Serekkomarî ra ame afukerdene. Tay kesî bi afukerdişêko taybet serbest ameyî veradayene. Raştîyêk esto: Tirkîya de şar û bawerîyê cîya-cîyayî estî. Ê bi hezar serrano ke wayîrê na herre yî. Kesêk nêeşkeno vernîya înan bigîro.
Tirkîya de Sêwas nêqedîyaya
Kulu tewr peynî da zanayene ke Sêwas cayê bawerîyanî elewîyan û cayê Pîr Sultanî yo û qiseykerişê xo qedêna: “Elewî, qizilbaş û kesê rayîrê heqî ameyî veşênayene. Wexto ke ma ewnîyenî nê heme çîyan, ma eşkenê vajî ke sentezê tirk-îslamî yê Sêwasî reyna wejîyayo raşte. Zihnîyeto ke aye roje vatêne ‘Ma şerîat wazenî’ û bi saxî merdiman veşêna, ewro çi heyfo ke misteşar, wezîr û rayîrberê îqtîdarî yî. Rewşa nika nîşan dana ke hema zî Tirkîya de Sêwas nêqedîyaya. Ma do seba vîrînêkerdişê Sêwasî, aştî, demokrasî û edaletî timî înan vîrî bîyarî.” DÊRSIM
