Reaksîyonê elewîyan vera amadekarîya qanûnê ‘Serekîya Cemxane û Kulturê Elewî-Bektaşîyan’ dewam keno. Hemserekê Komeleyanê Elewîyan ê Demokratîkan (DAD) Mustafa Karabudakî derheqê qanûnanê serê cemxaneyan de qisey kerd.
Karabudakî da zanayene ke pê nê qanûnan yeno waştene ke elewîyî xo bi xo asîmîlasyon bikerê û vat: “Ma na elewîtîya ke tewreyê qanûnî ra vejîyaya, red kenê. Ma bawerîyêka ke pabesteyê Wezîrîya Kulturî ya qebul nêkenê. Hed û heqê çewî nîyo ke dormeyê yew masa de elewîtîye pênase bikero. Elewîtîye bawerîyêka qedîm a. Ancax pîr, ocax û anayê ma eşkenê elewîtîye ser o qisey bikerê, dewlete ney.”
Karabudakî vist vîrî ke 7ê teşrîna peyêne û 8ê teşrîna peyêne de çalakîya înan de polîsan hêrişê elewîyan kerdbi. Karabudakî bale ante ser ke elewîyî pê nê îqtîdarî bawer nîyê û vat: “Ma polîtîkayanê serê elewîyan samîmî nêvînenê. Ma têna wazenê ke esasê hemwelatîya têdûşte de bi qanûnê bingeyî yê demokratîkî meseleyê ma bêrê çareserkerdene. Ganî seba azadîya bawerî, nasname û ziwanê dayîke xebatî bêrê kerdene. O çax meseleyê elewîyan çareser benê.”
Hemserekê DADî Mustafa Karabudakî serrgêra 85. ya qetilkerdişê ci de Seyîd Riza yad kerd û vat: “Şexsê Seyîd Riza û hemrayanê ci de ez pêro qûrbananê Terteleyê Dêrsimî yad kena. Selçukîyan ra heta Komara Tirkîya şarêko qedîm tim ame qetilkerdene. Wextê komara Tirkîya de zî hişmendîya tek netewe û tek dewlete pêro komel û şarê bînî çin hesibnayî.” ANQARA
