Hemserekanê Pêroyîyan ê DEM Partî Tulaye Hatîmogullari û Tuncer Bakirhanî hesabanê xo yê medyaya dîjîtalî de vera sereştişê serê Şaredarîya Colemêrgî nêrazîbîyayîşê xo mojna.

Bakirhanî vat: ”AKP-MHPyo ke îradeyê şarî çin hesibneno bi destê polîs û mehkemeyan muraxcatê bêhuqûqîye keno. Destbendkerdişê Hemşaredarê Colemêrgî bêhuqûqî yo. Ma na dişmenîya vera kurdan red kenê. Ma do îradeyê xo nêdê destê çewî. Hinî bes o. Ma venga pêro şarê xo, kesanê demokratîkan, haştîgiran û şorişgêran danê ke hetê şarê Colemêrgî de vinderê.”

Tulaye vat: ”Îqtîdaro ke sindoqan de bin kewt gêreno ke îradeyê şarî xesp bikero. Ma do verê na hişmendîya qeyûman de sereyê xo nêarê war. No hêriş teyna vera îradeyê Colemêrgî ney vera îradeyê şaranê Tirkîya ame kerdene. Êyê ke demokrasî wazenê wa vera na hişmendîye tewir bigêrê.”