Hemserekanê Pêroyîyan ê DEM Partî Tulay Hatîmogullari û Tuncer Bakirhanî roniştişê Dewaya Kobanê ra verê cû verê Zîndanê Sîncanî de eşkerayîyêke daye.
Heyetêkê CHPyî, temsîlkarê xeylêk dezgeh û rêxistinan zî verê zîndanî de amade bîyî.
Tuncer Bakirhanî vist vîrî ke îqtîdar keno ke bi Dewaya Kobanê sîyasetî dîzayn bikero û bi hawayêkê bêhuqûqî çend serrî yo sîyasetmedaran zîndanan de verdeno. Bakirhanî îfade kerd ke seba ke înan paştî dayo Xoverdayîşê Kobanê ê nika yenê muhakemekerdene û vat: ”Şarî weçînayîşanê 31ê adare de tewirê xo yê vera na dewa eşkera kerd. Şar hinî azadîye wazeno. Ganî sîyasetmedarê tepişteyî vera bidîyê. Ma hêvî kenê ke ewro mehkeme bi layîqî mesuldarîyanê xo do bîyara ca.”
Tulay Hatîmogullariye dîyar kerd ke Dewaya Kobanê vera sîyasetê kurdan dafikêk a û vat: ”Xoverdayîşê Kobanê vera qirkeran û tecawuzkeran ame kerdene. Nêno qebulkerdene ke sîyasetmedarê ma destekê bi nê xoverdayîşî rê yenê muhakemekerdene. Ganî hinî na xeletîye ra bêra agêrayene. Eke na dewa de embazê ma cezaya muebede bigêrê no do goreyê huqûq, edalet û wijdanî nêbo. Ganî embazê ma vera bidîyê. Ewro verê ma de seba cuya hempare yew firsend est o. Bêrê nê roniştişî de ma nê firsendî bişuxilnê.”
