Hemserekanê DEM Partî û DBPyî Colemêrg de rêxistinanê komelê sivîlî de kombîyayîş kerd.
Kombîyayîş de Hemsereka DEM Partî Tulaye Hatîmogullari ard ziwan ke qeyûm vera kurda û demokrasîyî darbe ya û vat: ”Hinî tehamulê şarî bi qeyûman nêmendo. Merdimê ke raya xo nêdaya DEM Partî zî qeyûman nêwazenê. Erdogan û hemkarê ci welatî ver bi felaketan benê. Tirkîya na darbe qebul nêkena. Darbeya vera Şaredarîya Colemêrgî sey Dewaya Kobanê yew senaryo ya. Herinda hemşaredaran de qeyûmî yenê tayînkerdene. Ma do vera nê rejîmê qeyûman bi xurtî têkoşîn bikerê.”
Hemserekê DEM Partî Tuncer Bakirhanî vat: ”Şaranê Tirkîya û Kurdîstanî weçînayîşan de îqtîdarî rê cewabê xo da la wina aseno ke îqtîdar do cewabêkê hîna xurtî bigêro. Şarê Colemêrgî 40 serrî yo hetê ma de yo. Îqtîdar ney ra aciz beno. Vanê ‘derheqê hemşaredaranê kurdan de dewayî est ê.’ Nê welatî de şima çew nêverda ke derheqê ci de dewa çin biba. Qeyûmî û îqtîdar vera kurdan dişmenîye kenê. Kurdî do qetî xoverdayîşê xo ra fek vera nêdê, wayîrê îradeyê xo vejîyê û şaredarîya xo apey bigêrê. Ma zî heta peynî hetê nê xoverdayîşî de yê.”
Tulaye Hatîmogullari persê weçînayîşanê verwextî ser o vat: ”Ma tim het û mîyanê şarê xo de yê. Parlamento xora warêkê têkoşînî yo la ma rê teyna uca çin o. Ma bi sereyê xo parlamentoyî ra xo apey biancê no do çîyêkî rê fayde nêkero. Şarê Tirkîya weçînayîşanê verwextî wazenê ke no zî heqê înan o.”
