Komeleya Cigêrayîşê Kultur û Ziwanî ya Mezopotamya (MED-DER) bînaya xo ya Amedî de kongreya xo ya 2. kerde. Xeylêk temsîlkarê rêxistinanê komelê sivîlî tewrê kongre bîyî. Hemserekê MEB-DERî Mehmet Esenî kongre de qisey kerd û bale ante polîtîkayanê teda yê vera ziwanî ser.
Netîceya kongre de Rifat Ronî û Şîlane Elmas Kan sey hemserekanê newîyan ameyî weçînayene.
Elmase Kan girîngîya ziwan û kulturê kurdan viste vîrî û vat: ”Girîngîya ziwanî girîngîya yewî yaa. Xebatê ma, cuyê ma çend bi kurdkî bibê yewîya ma zî hende bena xurtêr.” AMED
