Serekê DBPyî yê Agirî Mûstafa Akyolo ke serra 2011an de Agirî de amebi têpiştene, zîndan de wefat kerd
Serekê Partîya Herêmê Demokratîkî (DBP) yê Agirî Mûstafa Akyolo ke serra 2011an de Agirî de amebi têpiştene, zîndan de wefat kerd.
Akyol serra 2011an de Agirî de amebi têpiştene û bi sucdarîya ‘endamê rêxistine’ 13 serrî û 6 mengî ceza ci rê amebi dayene. Akyol hefteyê ravêrte Zîndanê Tîpa Lyî yê Patnosî ra amebi berdene bi Nêweşxaneyê Cigêrayîşî yê Unîversîteya Yuzuncu Yilî yê Wanî. Akyolî 15ê êlule de wefat kerd. Avûkatê ey 5 mengî verî eşkera kerdibi ke Akyol nêweşê parkînsonî yo, nêweşîya ey a zerrîye esta û semedê nê nêweşîyan ra nêşkeno zîndan de bimano. 9ê êlule de zî Sidik Bûgrahan o 87 serrî Zîndanê Meraşî de wefat kerd. WAN
