Hetê artêşêke, qewmêke yan zî dewletêke bîne ra dagirkerdişê welatî merdimî çiqas bi kul û jan o, çiqas xerepnayox û çinêkerdox o yeno zanayîşî, la o yo ke ey ra zî zêde bi kul û jan o, ey ra zî zêde xerepnayox û çinêkerdox û îxanetê zerey merdimî yo. Dagirbîyayîş, bêziwanmendiş, bêwarmendiş û bêganmendiş o, la îxanetkerdiş hem bêziwan, bêwar û bêganmendiş o hem zî bêrûmet, bêhîsset û bêşerefmendiş o. Şarê Kurdî û welatê înan zehf rayan rast ro îxanetê zerey xo ameyo. Tarîxe îxanetê zerey înan bi qasê tarîxe dagikerîya welatê înan kan a.
Têkberdişê her serhildan û têkoşîna hemverê dagirkerî de gişte îxanetî eysena, binê her sîyêke ra îxanet vecêno hemverê merdimî. Xo ra dagirkerîya her çar dewletan bi xo zî bi paştîdayîşê xayîn û xoroteyanê mîyanê Kurdan mende manena. Rewşêke zehf bi êş o ke rocê ma yê eyroyî de dagirkerdiş û êrîşê dewleta Tirkîye yê Efrînî ser de zî yê Başûrî ser de zî bi paşta xayîn û xoroteyanê ke mîyanê Kurdan de yê yeno verdewamkerdişî. Herekatê Pencikî ke nê çend aşmê peyînan de Tirkîye Başûrî ser de verdewam kena bi xo zî eserê xaîn û welatroteyanê ke xo sey serek û rayveberê şarê Kurdî vînenê yo. Dagirkerîya ke eyro roc Tirkîye bi nameyê Herekatê Pencikî Başûrî ser de verdewam kena bi paşta rayveberanê PDK’î ke bîyê îxanetkarê milî yê şarê Kurdî û nizdê hîris serre yo nê rolê xo bê kêmanî verdewam kenê û gune şarê Kurdî misnenê yeno verdewamkerdişî.
Nê welatroteyanê ke Başûr artêşa Tirkîye rê pêşkêş kerdo sey ke perçeyê welatê ma yo ke kono Başûr malê înan û bay înan o bi tapû bo, bê şerm û fedî vecênê hemverê raya pêroyî û sey zerrece wanenê vanê wa PKK Başûr ra vecîyo. Hem bê şerm û bê fedî dagirkerî perçeyêke welatî de bi ca kerdê hem zî qibe qibe kenê vanê wa ewladê nê welatî yê esasî, pawitoxê şarê Kurdî û nê welatî nê perçeyî ra vecîyê. No vatişê înan tenê zehf weş mojneno ra ke rayveberê PDK’î çiqas pêgiroteyê dagirkeran ê û sînorê ke dagirkeran pê welatê ma kerdo çar perçe bi zerrêka rehet e qebûl kenê. Yeno zanayîşî ke şarê Kurdî semedê pêrisnayîşê welatê xo û şarê xo ke sînorê dagirkeran mîyanberê înan de ameyê rûnayîşî çiqas xo ver dayo, têkoşîyayê û canê xo kerdo feda la, gereke bêro zanayîşî ke rayîrê wedartişê dagirkerî û sînoranê dagirkeran raste ra wedartişê îxaneyê zerey xo de yo.
Heta ke şarê Kurdî peynî ro îxanetê zerey xo nêaro wedartişê dagirkerî zehmet o. Eke ma xoserîya şarê xo wazenê, eke ma azadîya welatê xo wazenê lazim o ma vernîya her çî de kokê îxanetî bîyarê û yenîyê welatroteyan ziwa bikerê. Heta ke ma îxanetî zerey xo ra nêdê safîkerdişî go dagirkerî zî bi pencikanê îxanet û welatroteyan dagirkerîya xo, zilm û heqaretê xo verdewam bikerê. Heqê ti kes, ti partî û ti îdeolojî çinêyo ke perçeyêke welatê ma bikero binê linganê dagirkeran û ro şarê ma qedexe bikero. Heta şarê Kurdî nêbo yew raşte ra wedartişê îxanetî zehmet o. Lazim o şarê Kurdî yewîtîya xo virazo û hemverê xaîn û welatroteyan qerarname û qanûnan veco û cezayanê pîlan ro înan bido birrnayîşî. Lazim o ma bizanê ke wedartişê dagirkerî zî wedartişê îxanetî de ya, azadî û xoserîya ma zî wedartişê îxanetî de ya.
