Weçînayîşê sererkkomarî û parlementerîye yê demê 28ine rê demêk kilm mend. Her cayê Tirkîya û Kurdistanî de xebata weçînayîşî bi lezkî dewam kena. Îskenderunê Hataye de zî cinîyî vera hende rijnayîşê erdlerzî seba ke Partîya Çep a Keske qezenc bikera keye bi keye gêrenê û xebete rayra benê.
Îskenderunî de cinîyan ajansê ma rê ercnayîş kerd û vatî ke xelisnayîşê cinîye û ameyîşê edaletî bi Partîya Çep a Keske mumkun o.
‘Çîyo ke ma cuyayî raşte de yo’
Cinîya bi nameyê Aysel Orale Partîya Çep a Keske sey partîya demokrate biname kerd û vat ke îqtîdarî neheqî bi kurdan keno û ganî na neheqîye bido vindarnayîş. Aysele wina dewam kerd: “Bi serran o çîyê ke bi ma da ciwîyayîş raşte de yo. Rewşa zîndanan raşte de ya. Destkewtişê cinîyan înan dest ra girewt. Cinî cuye ya. No weçînayîş do bi cinîyan dîyar bibo. Nê weçînayîşî de vera pêro bêhuqûqîyan ma do şêrê sindoqan ser. Ma do cewabê xo bidê. Ma do deste yewbînan bitepişnê. Partîya Çep a Keske partîya heqîqî ya. Çi destê ma ra bêro ma do bikerê. Ganî ma rayranê xo bidê Partîya Çep a Keske.
‘Mi 100 keyeyan rêxistin kerd’
Fatma Şahîne zî dîyar kerd ke do rayê xo bida Partîya Çep a Keske û seba ke nêseyyewbînanîya ke cinî cuyena raşte ra wedarîya ganî Partîya Çep a Keske bikera meclîs. Fatmaye wina dewam kerd: “100 keyeyê ma esto. Mi heme rêxistin kerd, ma do rayê xo bidê Partîya Çep a Keske. Ma cinîyî do bibedilnê. Çi bikewo serê milê ma, ma do bikerê.”
‘Xelisnayîşê cinî Partîya Çep a Keske de ya’
Cinîya bi nameyê Fîdane zî wina vat: “Ma do nê weçînayîşî de rayanê xo bidê. Ganî tay çîyî bibedilê. Bi serran o ma nê ezîyetî ancenê. Erdlerzo ke qewimîya de dewlete 4 rojan nêameye. Ma tena verda. Ma cinî seba xelsinayîşê xo rayanê do bidê Partîya Çep a Keske û na partî do biba partîya xelisnayîşê cinîyan.”
‘Ma do bi hawayêkê xurt bikewê meclîsî’
Xude Tane zî eşkera kerd ke Partîya Çep a Keske bi hûmarêke baş do şêra weçînayîşî û dîyar kerd ke ê erdlerzî de tena mendî, cenazeye înan bine xirban de mendî û coka ra do rayê xo bidî Partîya Çep a Keske.
‘Ez rayê xo nêdana dişmenê cinîyan’
Şukran Tane da zanayîş ke aye zî xo rayê xo bida Partîya Çep a Keske û vat ke ganî êdî no îqtîdar şêro. Şukrane sewbîna ard ziwan ke aye veng dana heme cinîyan ke hîna zêde têkoşîn bikerê û rayê xo zî nêdê partîyê dişminê cinîyan. HATAY
