Dewleta tirke her roje pê çekanê kîmyewîyan hêrişê Herêmanê Pawitişî yê Medya û waranê sivîlan ê Başûrê Kurdîstanî kena. Tewr peyên HPGyî da zanayene ke mabênê 7-9ê kanûne de dewleta tirke tewr tay 150 reyî çeperê şerî yê Şehîd Botanî yê Warê Xoverdayîşî yê Çemçoyî bi çekanê kîmyewîyan dayê bombayan ver.
Pisporê fîzyolojîye Dr. Sadat Abdullah Ezîzî derheqê tesîr û zeraranê hêrişanê kîmyewîyan de ANFyî rê qisey kerd. Dr. Ezîzî pare kerd ke hew tewirê çeka kîmyewîye goreyê qanûnanê mîyanneteweyîyan qedexe yo û vat: “Çekê kîmyewî têna merdiman rê ney xoza rê zî zerarêkê pîlî danê. No zî beno sebeb ke zerarê ci bi serran dewam bikero. Yanî bi giranî ameyoxî rê tesîr keno. Ganî heyetê mîyanneteweyî û xoserî herême d eşuxilnayîşê çekanê kîmyewîyan ser o cigêrayîşan bikerê. Eke nê cigêrayîşan de tesîrê nê çekan bêrê tesbîtkerdene zî ganî dewletê eleqedarî mesuldarîya xo bikerê. Ganî seba nê cigêrayîşî zî merkezêk bêro awankerdene. Rêxistinê komelê sivîlî, dezgehê heqanê merdiman, merdimê mesuldarî ganî babete ser o vinderê. Seba ke babeta çekanê kîmyewîyan jenosîdê vera neteweyêke de eleqedar o ganî dezgehê xoserî têbigêrê.”
Dr. Sadat Abdullah Ezîzî ard ziwan ke tay kurdê xayînî babeta hêrişanê kîmyewîyan kenê babetêka sîyasîye û vat: “Nê kesî goreyê menfaetanê xo xebitîyenê. Ganî dezgehê heqanê merdiman ê mîyanneteweyî na babete babeta sîyasetî ra vejê û bikerê babetêka komelkî û xozayî. Meseleya kurdan Tirkîya de bi hêriş û çekanê qedexeyan çareser nêbena. Prosesanê verênen no mojna ma ra. Bi kiştişî meseleyêke çareser nêbena. Kilîdê çareserîye dîyalog ê.”
