HDPyî eşkera kerd ke bînaya Partîya Demokratîke ya Şaran (HDP) ya Îzmîrî ameye vêşnayene û xebatkarêka partîye ameye qetilkerdene.
HDPyî vat: ”Bi mengan o partîya ma hetê îqtîdarî ra, Wezaretê Karanê Zereyî ra yeno hedefkerdene, pê armancê provakasyonî tay keyeyî verê bînayanê ma de nişnenê ro. Netîceya înan de ewro serê sibatî saete 10.30 de vera bînaya partîya ma ya Îzmîrî hêrişo çekdar ame kerdene.”
HDPyî da zanayene ke hêrişker 35-40 serre yo û wexto ke xebatkara partîye Denîze Poyraz zere de bi eşt bîna ser.
HDPyî vat: ”Hêrişkerî guleyî raşnayî derûdore û bîna verdaye adirî. Xeylêk wext ci rê mudaxele nêame kerdene. Hêriş de xebatkara partîya ma embaze Denîze Poyraz ameye qetilkerdene.”
Dima ke agahîya hêrişî ameye eşnawitene şar verê bînaya Konakî de ame pêser.
HDPyî vist vîrî ke 16ê hezîrane de Dewaya Kobanê de Sîncan de zî provakasyon amebî kerdene û îfade kerd ke no hêriş netîceya provakasyonî yo.
HDPyî vat: ”Mesaj û armancê nê hêrişî zelal o. Êyê ke no provakasyono bitehluke kerd, fermandarê nê serebûtî îqtîdar o ke partî û rêxistinê ma sey hedef mojnayêne.” ÎZMÎR
